Den apénas 9 dia: Gengnan na Haiti a mata 471 persona

PORT AU PRINCE – E situashon ku e habitantenan na Haiti ta bibando aden ta keda konsiderá komo un bida di horor debí na violensia di gengnan sin eskrupulo.
Gengnan di bandidonan ku ta konsentrá na Cité Soleil den apénas 9 dia ta responsabel pa 471 morto, 127 herido i no papia mes di kasonan di sekuestro i violashon kontra mucha i hende muhé.
E kriminalnan aki no tin eskrupulo ya ku outoridatnan no ta bai mes na Cité Soleil debí ku e miembronan di e gengnan aki tin armanan muchu mas potente ku polis.
Ulrika Richardson ku ta un kordinadora di e organisashon di ONU na Haiti a pidi gobiernu merikano pa intervení na e isla debí ku awor si e situashon a sali kompletamente for di man. Ariel Henry promé minister di Haiti mes tin miedu debí ku te ainda e no a sali bisa nada di lokual ta pasando na Cité Soleil.
E situashon na Haiti a sali for di man for di momentu ku kriminalnan a asesiná presidente Jovenel Moïse i ku te ainda e pais no tin un lider.