Delinkuentenan na Haiti a asaltá: Bùsnan ku tabata transportá selekshon di Futbòl di Belize

PORT AU PRINCE – Ayera e selekshon di ekipo di Futbòl di Belize a yega Haiti pa partisipá den e kompetensia di eliminatorio Mundial di FIFA kontra e selekshon di Haiti ku mester keda selebrá djaweps próksimo.

E selekshon huntu ku nan coachnan i ehekutivonan

di Belize a keda transportá den tres bus.

Tin indikashon ku e bùsnan aki mester a pasa den un zona bastante peligroso kaminda e delinkuentenan na Haiti ta kontrolá e zona.

Konsekuensia di esaki ta ku un grupo di asaltante fuertemente arma a blòkia e bùsnan aki i a drenta asaltá tur e futbolistanan.

Polis mester a kuminsá negoshá ku e bandidunan aki pa asina nan laga e selekshon di Belize sigi nan kaminda pa hotèl.

Haiti a bira un di e paisnan mas insigur na mundu kaminda delinkuentenan tin kontrol riba sierto zona nan na Port Au Prince.

Deon McCauley ku ta kapitan di e selekshon di Belice den un entrevista a sigurá ku lokual nan a pasa aden tabata momentunan di horor ya ku ta trata aki di kriminalnan sin eskrupulo ku no tin miedu di muri.

FIFA ta eksigí di parti gobiernu di Haiti pa sòru pa tin bon seguridat na hotèl kaminda e selekshon di Belice ta hospedá i pa durante nan estadia nada no pasa ku nan.

E partido entre Haiti i Belice lo keda selebrá djaweps próksimo den stadion Salvo Cator na Port au Prince.