Debate Babiloniko mester pasa parlamento pa eliminá e redukshon di 12,5% riba kondishon salarial

WILLEMSTAD, Dia 30 di mei último frakshon di PAR a tuma nota di un komunikado ku Promé Minister Pisas a emití, ku ta hiba komo titulo “Kondishon pa por eliminá e redukshon di 12.5%”.
Promé Minister Pisas ta indiká ku den un kombersashon telefóniko, sra. sekretario di estado Van Huffelen, a inform’é ku dia 20 di mei ku a pasa, Konseho di Minister di Reino a tuma e desishon ku por eliminá e medida di redukshon di 12,5% riba kondishonnan laboral di ámtenar i otronan ku tambe ta kai bou di e medida aki for di 2020, basta kumpli ku 8 kondishon spesífiko ku e Konseho di Minister di Reino a stipulá.
Den e komunikado di prensa Promé Minister Pisas ta menshoná e 8 kondishonnan i ta informá pueblo di Kòrsou ku e por ta di akuerdo kuné, pero algun ainda mester evaluá promé ku tuma un desishon final.
I pa e motibu aki el a opta pa duna instrukshon na Minister plenipotensiario pa wanta e tratamentu di e punto aki te siguiente reunion di kolegio di Minister di Reino.
Nos ta di opinion ku parlamento mester haña partisipashon i informashon adelantá i promé ku Gobièrnu fiha un posishon riba esaki ku lo bai pa Konseho di Minister di Reino. Lokual te ku awe no a sosodé.
Ta lamentabel pa mira kon e proseso di 12,5% ta desaroyando. Ministernan riba media sosial ta hasi promesa di pago di ‘vakantie-uitkering’, ku resultado ku tin diskushonnan fuerte den medionan di komunikashon entre Ministernan di gabinete Pisas.
I lo mas reprochabel ta ku Parlamento mes, ku ta e pilar legislativo i representantenan eligí di e pueblo aki no ta haña ningun informashon di desaroyonan aki. Tin un falta grandi di transparensia .
Frakshon di PAR a pidi un reunion di komishon di finansa for di 14 di mart pa papia tokante e tópiko i nunka e reunion aki no a keda yamá.
Mirando e komunikado di Promé Minister Pisas i tambe e kriterionan ku ta keda menshoná, ta imperativo ku Parlamento deliberá ku Promé Minister promé ku tuma kualke desishon riba e tópiko aki.. demas algun di e kondishonnan menshoná dependé di e trabou legislativo ku parlamento tin ku hasi. I ku Gobièrnu no tin outoridat pa disidí riba e esaki.
Pa e motibunan aki , nos ta pidi un reunion públiko di Parlamento ku karakter di urgensia, hasiendo uso di artíkulo 64. Pa e reunion aki nos ke invitá promé Minister Pisas.
E urgensia ta tambe ku reunion mester tuma lugá promé ku e tópiko aki keda tratá den Konseho di Minister di Reino, pa e por ta efektivo i duna Parlamento e oportunidat pa kontribuí den e proseso importante aki.