Daño material i finansiero por yega te 2.6 mion florin!

WILLEMSTAD. E mas resiente kalkulashon kuantu e daño imaterial i material
lo kosta kaha di gobiernu a subi 1.6 mion kontando tur e gastunan ku a akumulá desde ku e señora a kontratá mr. Pols pa demandá gobiernu pa haña daño perwisio i pago di gastunan ku e desgrasia a kousa na su persona.
Pa kolmo e gastunan a bira masha haltu pasobra dos aña pasá kasá dje señora a fayesé komplikando e situashon mas tantu ainda pasobra te kasá tabata kuida señora i awor mas gastu a bin aserka.
E kaso aki a sosodé dia 4 di maart di 2014 durante marcha di karnaval na Marchena ora e muraya ku ta separá kurá di dos kasnan a basha’bou lesionando e señora i kousando lesion iremediabel na su lomba.
Ela sufri loke nan ta yama un dwarslaesie total.
Den e promé veredikto ku tabatin den e kaso wes a kondená gobiernu pa paga e señora un vorskot di 250.000 florin pa kubri daño na su kas i kompensa e inkonveniensia ku e ta sufriendo.
Diferente rapòrt ta indiká ku e daño total e tempu ei tabata NAf 1.604.305,72 pasobra den e suma tin kompensashon di pena imaterial i material i gastunan relashoná ku su kondishon manera un outo speshalmene adaptá i ekipá, kambionan na i den su kas i yudansa pe entrada ku ela pèrdè.
Kuantu e daño material ta eksaktamente despues di tantu aña no por bisa presis pero en todo kaso wes ta haña ku e mester por haña un vorskot pendiente di pago dje kompensashon di mei mion florin ku e lo haña.
Sin importa kuantu sèn e señora lo bai haña, tin espasio pa paga e vorskot.
Situashon finansiero dje señora ta masha difisil i gobiernu ku kurason pretu no tabata dispuesto di yuda ku sèn aparte di algun kos ku nan a laga drecha.
Ademas ku sea ni kon haltu e vorskot ku e señora a pidi ta, wes tin sigur ku e lo haña mas ku esei na kompensashon di por lo menos 250.000 florin.
Te ku 8 aña pasá kasá dje señora tabata na bida i tabata kuida e señora pero e homber a fayesé dos aña pasá.
No tin famia ku por tuma e señora pa nan kuida i p’esei mester di un vorskot pa paga pe kuido.
E señora a pidi un vorskot di 300.000 florin i wes mes a hasi su kalkulashon.
E gastunan pa aña ta konsisti di:
– adaptashon ne kas NAf 90.000
– material pa yuda NAf 26.000
– adaptashon ne outo NAf 66.000
– kuido di enfermeria NAf 110.000
– hydrotherapia NAf 17.000
– hende pa yuda ku trabou di kas NAf 13.000

GOBIERNU TA
RESPONSABEL
Wes a sali bisa ku gobiernu ta responsabel pa e daño ku e señora a sufri i unabes ku rekonose esei, ta un prome paso masha importante pa e gana e kaso.
Ku gobiernu tin ku paga kompensashon ta opvio i te suma so mester yena.
Konseheronan dje señora mes ta kalkulá e daño material ku e señora a sufri I lo sufri den future lo ta 2.7 mion florin. Un komishon di arbitrahe a kalkulá e sèn ku gobiernu tin ku paga na tur ta 2.3 mion florin.
Teniendo kuenta ku tur faktor ne momentonan aki wes a asigná pa gobiernu paga e señora un vorskot di NAf 63.150,= pa seis luna asumiendo ku den seis luna gobiernu mester a disidi kuantu plaka gobiernu lo paga finalmente.