Internashonal
Daniel Ortega a laga sera seis radio katóliko na Nicaragua
MANAGUA – E régimen di Daniel Ortega na Nicaragua via di e Instituto Nikaragwense Telcor (Telecomunicaciones y Correos) a ordená ayera pa sera seis radio katóliko.
E motibu dikon Daniel Ortega a laga sera e seis radionan aki ta debí ku e diktador tin desakuerdo ku lokual nan ta manifestá kontra su régimen na Nicaragua.
E radio emisoranan ku a sera den e kaso aki ta Radio Hermanos, Radio Nuestra Señora de Lourdes, Radio Nuestra Señora de Fátima, Radio Alliens, Radio Monte Carmelo i Radio San José ku ta ópera na nivel nashonal na Nicaragua.
Obispu Rolando Álvarez ku ta dirigí e radionan aki a indika ku ela risibí un karta di parti Nahima Janett Díaz Flores direktora di Telcor indikando ku nan pèrmit pa sigi transmití a kaduká.
Na momentu ku Obispu Rolando Álvarez a pidi pa reuní ku Nahima Janett Díaz Flores ela informá ku no tin ningun motibu debí ku e gobiernu di Daniel Ortega
lo no permití pa nan sigi transmití.
E radionan aki a haña pèrmit pa transmití for di 2003 i pa awor ta presentá ku e kuenta ku e régimen di Daniel Ortega lo no permití nan sigi transmití mas.