Daniel Ortega a laga detené otro pastor di Iglesia katóliko

MANAGUA – Daniel Ortega a bai gera kontra Iglesia katóliko debí ku e ta kontentu ku Obispu i pastornan no ta di akuerdo ku su forma di goberná na Nicaragua.

E siman aki a toka turno na pastor Óscar Benavidez ku a keda detené durante momentu ku e tabata den su outo den tráfiko para riba kaya na e munisipio di Mulukuku.
Testigunan a presensia kon polis a baha pastor Óscar Benavidez for di su outo i bai kuné.

Te ku awe mainta representantenan di Iglesia katóliko na Nicaragua no por a lokalisá pastor Óscar Benavidez na sentral di polis na Mulukuku.

Esaki a pone ku Diósesis di Siuna a denunsia ayera mes ku polis bou di òrdu di Daniel Ortega a detené pastor Óscar Benavidez i tene detené na un luga deskonosí.
Óscar Benavidez ta bira e di tres Pastor ku ta keda detené na Nicaragua pa lokual ta e aña aki.
Medionan di komunikashon na Nicaragua a konfirmá ku tin un total di 9 pastor detené bou di òrdu di Daniel Ortega inkluyendo obispu Rolando Álvarez.
Aparentemente obispu Rolando Álvarez ta sera huntu ku otro sinku pastor na Palasio Episkopal de Diósesis na Matagalpa.
E komunidat Katóliko ta representá un total di 58,5 % di e poblashon ku ta ekivalente na 6.5 mion di habitante na Nicaragua segun e último senso nashonal.