Damitanan hóben lokal a gradua pa kurso di teknologia riba ‘digital literacy, web development and coding’

Willemstad, Kòrsou Na komienso di e aña aki, komo parti di selebrashon di Dia Internashonal di Hende Muhé, Liberty Latin America, kompania mama di Flow, lider den telekomunikashon, a uni forsa ku Society of Women Coders pa lansa un inisiativa enfoká riba empoderá e siguiente generashon di hende muhénan ku ta liderá den área di teknologia. E kolaborashon a proveé oportunidat na mas ku 800 damita den Karibe i Latinoamérika pa partisipá na un kurso di 20 siman riba ‘digital literacy, web development, and coding skills’.
Despues di binti siman di trabou duru i dedikashon, kuater studiante partisipante lokal di entre 13 pa 17 aña a finalisá eksitosamente e kurso aki ku ta proveé nan ku un base sólido si akaso nan ke skohe un karera den e área STEM (Science, Technology, Engineering, Mathematics). Kay Cey-Anne Meulens, Shanté da Costa Gomez, D’Elainah Felipa i Cristina Mendez Canelon ta Flow su graduadonan 2022 ‘Future Tech Stars’!
“Aparte di train nos siguiente generashon di streanan di teknologia, nos ta mira esaki komo un invershon general den nos hubentut i komunidatnan. Nos hubentut i nan akseso na oportunidatnan ta un di nos enfokenan prinsipal. Manera nos a demostrá, nos ta sigui invertí dor di no solamente proveé internèt grátis na skolnan, sino tambe dor di krea e tipo di oportunidatnan úniko aki” Rauf Engels, direktor statutario di Flow Kòrsou a indiká.
“Nos mester prepará nos generashonnan pa áreanan ku ta liderá i ku ta krusial pa nos futuro desaroyonan. Komo un kompania ku ta dediká na yuda krea mas igualdat di genero, nos a haña e kolaborashon aki ku Society of Women Coders un oportunidat úniko pa ekipá damitanan lokal ku konosementu i abilidatnan balioso ku lo sirbi nan tremendamente pa drenta un área kaminda sigur tin mester di hopi mas representashon di hende muhé.” señor Engels a agregá.
E studiantenan a keda invitá na ofisina prinsipal di Flow kaminda nan a risibí un vershon imprimí di nan sertifikadonan i tambe un regalo meresí pa nan dedikashon. Nan a keda agradablemente sorprendí i a siña ku trabou duru ta paga, i tin biaha di forma inesperá.
“Mi seshon tabata 7’or di anochi tur siman, dos biaha pa siman; un seshon general i un seshon ku un mentor. Tabatin seshon na ingles 5’or di atardi, pero mi a sigui e seshon na spañó. Tabatin momento ku mi mester a hasi sakrifisio i no por a hasi kosnan leuk òf pasa tempu ku mi famia, ya ku e kurso a dura durante temporada di vakashon tambe. Pero el a bale la pena sigur. Mi a siña asina hopi kos i a disfrutá di e kurso. Mi ta orguyoso di mi mes i di e otro mucha muhénan ku a gradua. Nos a logr’é!” Cristina Mendez Canelon, studiante di Kolegio Alejandro Paula, kende tambe a haña e oportunidat pa partisipá, a indiká.
Ta ku gran orguyo Flow Kòrsou ta felisitá e kuater damitanan lokal aki ku a perseverá pa finalisá e kurso intensivo aki. I pa medio di esaki nos ta reiterá nos kompromiso pa sigui dediká na logra mas igualdat, diversidat, i inklushon, mientras ku tambe nos ta sigui invertí den nos hubentut, proveendo oportunidatnan pa medio di teknologia i mas.