Lokal
CWC a lansa ‘JUMP’ na CANTO
Miami, FLORIDA – C&W Communications resientemente a desvelá su strategia pa yuda redusí e divishon digital den Karibe..
Un inisiativa titulá ‘JUMP’ a ser introdusí dor di e operadónan di Flow, Flow Business, C&W Business i BTC komo parti di e esfuersonan pa krea mas inklushon digital den un region ku te ku awe ainda ta disfrutá di solamente 50% di penetrashon di internèt fiho.
Pero ku sosten di partnernan ku ta aportá finansieramente, nos meta ta pa signifikativamente redusí e distansia i diferensia aki denter di tres pa sinku aña pa medio di un programa ekstensivo ku ta enfoká riba proveé akseso, aparatonan, i konosementu digital,” Rosario Veras, Senior Director, Marketing and Operations, pa C&W Communications a indiká.
Veras tabata dirigí su mes na un oudiensia di lidernan regional i tambe lidernan di gobièrnunan, huntu ku reguladónan, operadónan di telekomunikashon, i stakeholders di e industria durante e di 37 edishon annual di ‘CANTO’s Conference & Trade Exhibition’ na Miami.
“Inklushon digital ta trata di sòru pa e benefisionan di teknologia digital ta disponibel pa tur hende, i nos mester tin strategianan intenshonal pa inklushon digital, i pa lucha pa eliminá bareranan institushonal i struktural pa akseso na teknologia,” el a añadí.
Veras a indiká ku ‘JUMP’ tabata un invershon riba término largu dirigí pa kambia bidanan, habri e potensial di ekonomianan, i di bèrdat fasilitá progreso den Karibe.
“Nos ta komprometé na kultivá nos medionan i kapabilidatnan p’asina mas studiane por konektá na nan klasnan virtual, mas personan por benefisiá di servisio di salú digital, i esnan ku ta buska trabou por mehorá nan buskeda pa trabou i tambe tin akseso na e proseso di aplikashon. Nos mishon prinsipal ta pa konektá tur persona na internèt – irespektivamente di nan salario òf unda nan ta biba,” el a indiká.
C&W Communications lo ta partner ku gobièrnunan den region, huntu ku organisashonnan non-profit i tambe sektor privá pa sigurá e éksito di JUMP.
“E divishon digital ta un problemátika grandi i multifasétiko ku ta rekerí solushon holístiko, i un strategia eksitoso ta rekerí pa konstruí partnershipnan inovativo. Pues, nos mes krea konhuntamente solushonnan den partnership ku e komunidatnan kaminda nos ta opera pa sigurá ku ningun siudadano ta keda afó.
“Tin un ròl pa kada negoshi, gobièrnu, i komunidat, i nos ta spera di por krea un oportunidat pa tur por trese nan energia, dedikashon i kolaborashon den e mishon aki pa elevá nos region.”
Aamir Hussain, Chief Technology & Product Officer na Liberty Latin America, e kompania mama di C&W Communications, tambe a hiba palabra durante e konferensia riba “Futuro di internèt fiho den Karibe’.
“Internèt fiho ta un derecho fundamental pa kada siudadano, i aunke ku tin 27 mion usuario den Karibe, esaki ta representá solamente un 60% di e populashon total, I p’esei tin un tremendo oportunidat pa krese,” el a bisa.