Curaçao Marine den man di baké nobo

Jens van der Lubbe Managing Director entrante 1 di mei

WILLEMSTAD – Awor ku resientemente e empresarionan lokal Justus i Jens van der Lubbe a kumpra Curaçao Marine na Pletterijweg na Parera, kontinuidat di e kompania ta seif pa término mas largu.
Komo Managing Director nobo Jens van der Lubbe ta mira bon oportunidat pa ekspandé e aktividatnan di e empresa i pa sigui halsa kalidat di servisio mas.
Pa ekonomia di Kòrsou e kontinuashon nobo aki ta un kontribushon sólido.
Miéntras ku tata Justus ta kontinuá ku su kompania di seguro Inter-Assure, e yu hòmber Jens komo sosio nobo huntu ku yard manager Gareth Weber ta na mando di e waf aki.
Weber a fungi den e kalidat aki kaba bou di mando di e anterior doño Harry Faydherbe, ku a preferá pa traspasá e empresa na un generashon mas hóben.
Komo e waf mas grandi den su ramo i ku un reputashon estupendo, tantu lokalmente komo den eksterior, Curaçao Marine tin e potensia pa atraé un parti kresiente di e merkado regional.
Esei pues ta loke Jens van der Lubbe ta bai p’e.
Historial di servisio
Jens, a nase na Sint-Maarten i a lantá na Kòrsou, for di chikí tabata sinti un afinidat fuerte ku laman i konsekuentemente tambe ku boto.
Ku su diplomanan di International business management i Marketing i su konosementu di diferente idioma, for di edat hóben el a kuminsá den e ramo aki.
Algun aña pasá el a lanta su mes empresa Marine Zone pa mantenshon di boto i benta di produkto pa boto.
Esei tabata un tremendo paso den direkshon di Curaçao Marine, un kompania ku un ekselente historial di servisio ku ta eksistí dos dékada kaba.
For di 1 di mei último e ta na timon ku 18 miembro di personal den servisio, spesialmente hopi trahadó teknikamente altamente kalifiká.
Ademas, e waf, segun nesesidat di e klientenan, regularmente ta duna enkargonan sekundario na empresanan spesialisá i empresanan chikitu independiente na Kòrsou.

Allround
Di pafó hende konosé e empresa pa e kantidat di barkunan di bela i di motor stashoná den un kren grandi.
Pa motibu ku Kòrsou ta situá favorablemente na e parti sùit di e ruta usual di orkan, pa ekselensia e ta adekuá pa almasená yatenan kostoso di un manera sigur.
E waf ta traha huntu ku un eksperto den traha bela pa drecha i traha lona na midí. Pa ilustrá kon leu e servisio na kliente ta bai, Curaçao Marine por regla labamentu di paña, outo di hür i transporte pa i for di supermerkado tambe.

Infrastruktura
Den e área mas grandi di Schottegat na Parera, Curaçao Marine ta disponé di un tereno di 25.000 meter kuadrá.
Tin espasio pa máksimalmente 240 boto riba tera i aparte di esei mas ku 40 boto por mara na e pirnan kaminda tin konekshon di koriente pa 110 i 220 Volt. Na su propio slipway por saka boto for di awa riba treiler te un kapasidat di 60 tòn. Ademas tin un treiler te 40 tòn ku partinan suave na banda pa transportá yatenan mas sigur posibel.
Mas ku klaro ku tin provishonnan komplementario, manera kran potente. Un kondishon sin mas ta ku doñonan tin di perkurá pa un seguro válido pa tur e botonan.

Divisa
Jens van der Lubbe konosé tur faseta di e ramo aki te den detaye. E sa tambe unda tin e retonan i e ta bai pa nan tambe. E ke pa Curaçao Marine bira lider di merkado den Karibe riba tereno di mantenshon i tratamentu di boto, ku bista alabes pa medioambiente di tera i laman.
Ku e mehoramentunan ku e tin na bista kaba i e invershonnan adishonal embolbí, esei ta krea perspektiva pa mas divisa pa nos isla. Anke ku klientenan lokal tambe ta akudí na nan, gran mayoria di e klientela ta konsistí di strañero.