Covid 19 tabata pa nos siña.

Sinseramente bisá Covid 19 ku a kousa un krísis riba diferente tereno lo mester tabata pa nos tur siñansa. Mas ku tur kos, e enorme pobresa ku ta reina den kasnan di famia. Tuma e sirkunstansia sosial na Kòrsou na promé lugá, e enorme pobresa ku ta reina den kasnan di famia, sea ku un òf dos mayor na kabes, rondoná ku yunan tambe den un inmenso mizeria.
Ta situashonnan ku ta kondusí na barionan sumamente shushi, fis i a-higiéniko, anto ta hasi ku nos ningun no mester ta orguyoso di ta biba den un Kòrsou manera esaki. Tur hende tin falta den loke ta pasando, gobernantenan, polítikonan, lidernan sosial, sektor gubernamental, pero tambe komersio i industrianan eksistente.
E pobresa i mizeria reinante den sentenáres di kasnan di famia na Kòrsou, no ta únikamente debí na e leinan ku ta pèrmití e inhustisia sosial, sino esnan ku deliberamentu ta hasi mal uzo di e oportunidat.
E pregunta primordial ta: “Kon nos por drecha loke ta robes aktualmente, pero ku pa dékadanan ta manifestando?” Un gran amigu a bisa mi ayera ku esaki en prinsipio ta e oportunidat di oro pa reflekshoná riba nos sentido di bida, no tin rason pa sigui hasi e kosnan manera tur tempu tabata e kaso! Den su programa di atardi “Pro Info’ el a trata huntu ku un otro konosí, nos relashonnan ku Ulanda, kon aya na Ulanda den Senado “Eerste Kamer” nan a realisá ku sekretario di estado ulandes Raymond Knops i su grupo di amigunan di e élite ulandes a kita tur poder for di e gobièrnu di Sint Eustatius, pone un figura pa hèndel gobernashon riba e isla di e forma ku nan tabata ke, pero asina a tene elekshon pueblo di Sint Eustatius a pone e mesun gobièrnu ku tabat’ei promé bèk. Na Sint Maarten e relashon entre Ulanda i e gobièrnu di Sint Maarten klaramente a kue e buèlta di konflikto di manera ku na Sint Maarten nan a sera kabes pa denunsiá Ulanda riba plataforma internashonal. E úniko rekurso ku a keda Ulanda ta pa maluzá su poder dor di sera e kranchi di plaka awor ku e isla ta den gran nesesidat. Covid 19 a dal tur nos islanan duru i Ulanda ta debidamente konsiente di esei. Na Kòrsou e elekshonnan di 19 di mart 2021 a papia palabranan kla, e tabata un rechaso kontundente di e maneho di e gobièrnu amigu di Ulanda, di signatura PARista. Den Eerste Kamer mes i tambe Raad van State a kaba ku e kuchú ku Ulanda a pone na kabes di gobièrnu di Kòrsou den forma di e Caraibisch Orgaan voor Hervorming (COHO), faltando ku akuerdonan esensial inkorporá den Statüt.
Rumannan, segun mi ta nesesario kuminsá un trayekto pa kambia kosnan ku nos ta hasiendo robes, pa nos por tin e forsa pa lanta para. Pero ban trata na yega na rais di nos eksistensia. Mester rekonosé ku tin fayonan garaval ku nos mes ta kometiendo, sierto komportashonnan ta totalmente iresponsabel i ku ta krea i redundá den sirkunstansianan di bida insoportabel. Pa kuminsá e isla aki ta demasiado shushi, fis i a-higiéniko, anto no por sigui asina. Esaki ta rason pa start un trayekto nashonal ku ta konsentrá riba komportashon síviko. E gobièrnu nobo di Kòrsou tin e oportunidat di oro pa bai pa esaki, kanando padilanti ku esfuersonan pa hinka den kurason di nos hendenan ku bida mester ta aserká ku mas pashon i amor berdadero. Ban kuminsá ku limpiesa i higiena di Kòrsou su barionan i otro áreanan di enkuentro, anto pa djei sigui bòrda bai pa kue otro áreanan importante. Pronto mester toka tambe e tema di komunikashon, kon nos ta anda ku otro, stòp ku e aktitut komo si fuera ta krítika destruktivo so por lansa, kompartiendo konstantemente notisianan negativo i doloroso, anto ta laga para kompletamente un banda loke ta animá nos hendenan.