Colon ta e promé barku ku ta trese karga pa almasená na Bullenbaai

Willemstad- Djarason 28 di sèptèmber, pa 4’or di atardi, a marka un momentu históriko ora ku e botonan di tou Manta i Ola i e boto NC 6-L di Kompania di Tou Kòrsou (KTK) a guia e barku Colon pa mara na Bullenbaai Jetty-1. E barku Colon a bini ku un karga di 600.000 barí di ‘fuel oil’ pa almasená na nos terminal. E terminal di Bullenbaai ta un terminal kaminda normalmente ta almasená krudo na gran eskala. Durante di e último 4 simannan, Curaçao Refinery Utilities (CRU) a realisá hopi trabou pa perkurá ku e terminal ta kumpli ku e normanan di seguridat haltu rekerí, i alabes a kombertí parti di e terminal den un terminal dediká speshalmente na almasenahe di ‘fuel’. Entretantu CRU a bolbe duna oportunidat di empleo na 20 èks-trahadó. Oumento di aktividatnan na e terminal na Bullenbaai sigur ta nifiká mas aktividat pa KTK tambe.

E barku Colon a trese e promé karga di produktonan petrolero pa almasená na Bullenbaai komo parti di e akuerdo entre CRU, e kompania supsidiario di Refineria di Kòrsou (RdK), kual ta permití Caribbean Petroleum Refinery (CPR) almasená produkto na e terminal di Bullenbaai. E akuerdo di almasenahe ta pará lòs for di e akuerdo di mas aña pa operashon di refineria i e terminal na Bullenbaai ku Refineria di Kòrsou i CPR ta negoshando aktualmente. E akuerdo ta enserá ku lo por almasená te ku 7 mion barí di produkto na e terminal.
CRU i RdK tabatin basta trabou di preparashon promé ku por a kuminsá risibí produkto pa almasenahe na Bullenbaai atrobe. E trabounan a keda konkluí nèt na tempu pa por a risibí Colon komo promé barku. E terminal awor por almasená 2.4 mion barí di fuel oil, 4.1 mion barí di krudo i 350 mil barí di ‘diesel’. CPR lo hasi uso di henter e kapasidat di almasenahe, pues por spera mas barku ku produkto pa almansená próksimamente na Bullenbaai. Oumento di aktividatnan na Bullenbaai ta kontribuí na sosten di KTK komo un di e servisionan ku ta vital pa realisá aperturá di nos refineria.
Mientrastantu, e negosashonnan entre RdK, Gobièrnu di Kòrsou i CPR ta kanando ku e meta firme pa yega na un ‘Heads of Agreement’ mas pronto ku ta posibel.