CNN a anunsiá ku debí na pèrdida di miónes lo tin ku kita bastante hende for di trabou

ATLANTA – Chris Licht presidente di CNN a anunsiá ayera ku debí ku e kanal di notisia merikano tin dos aña konsekutivo a bin ta pèrdè miónes nan lo tin ku bai restrukturá e empresa.
Tin indikashon ku na nivel global CNN ku ta propiedat di WarnerMedia tin algu mas ku 4.000 empleado ta traha pa e empresa.
Chris Licht a bisa ku aña 2022 nan a pèrdè spònsernan importante ku a stòp di pone propaganda na CNN.
Esaki a pone ku CNN no tin e forsa finansiero manera tabata e kaso promé ku pandemia a asotá mundu.
Un otro gòlpi finansiero duru ku CNN a sufri ta nan sistema di Streaming ku tabata un frakaso total.
E proyekto di Streaming ku CNN a invertí miónes a pone ku den apénas algun luna mester a sera esaki.
Unabes ku e informashon aki a bai viral esaki a pone ku akshonnan di CNN riba bolsa di balores tambe a pèrdè balor.
Chris Licht a finalisá indikando ku tur nan kolaboradornan ku lo pèrdè trabou lo keda notifiká sea via video conference of pa koreo digital.