Lokal
Clean Up a selebrá su 10 aña ku un Kòrsou mas limpi
WILLEMSTAD – Curaçao Clean Up e aña aki ta selebrá su di 10 aniversario organisando e akshon nashonal di limpiesa di mas grandi. Un akshon pa keda konsientisá pa un isla mas limpi i por bisa ku a logra esaki ku e kantidat rèkòrt di boluntario.
Djasabra mainta, 17 di sèptèmber, a tuma lugá e di 5 ‘World Clean Up Day’ ku Kòrsou tambe a forma parti, huntu ku 191 pais mas, e evento di boluntario di mas grandi na mundu.
3400 boluntario a partisipá na e mainta di limpiesa na 150 lokashon den tur bario di Kòrsou. Riba 150 sambuyadó na 14 lokashon a rekohé 1213 kilo den fondo di laman ku pa gran parti tabata konsistí di liña di piska. Den transkurso di siman nos lo tin e kantidat definitivo di e kantidat di shushi ku a rekohé riba tera.
Atrabes di e último 9 añanan a rekohé mas di 3,2 mion riba nos isla ku un total di 21.000 boluntario.
DANKI na e kantidat grandi di boluntario, for di mucha te ku hende grandi hopi motivá i ku hopi alegria i energia, e aña aki atrobe a hasi limpiesa tantu riba tera komo den fondo di laman. Tambe nos kordinadónan di area ku a hasi un tremendo trabou.
Danki na komersio ku a respondé bon riba nos yamada. Tur otro instansia, bario, gruponan sosial i deportivo, skol i individualnan ku a partisipá hopi amor pa hasi nos isla mas limpi.
Danki spesial na prensa, Ministerio di GMN, Selikor, CTB, MCB, Federashon di Otrobanda, spesialmente Lisandra Martis ku for di un prinsipio a kere den e meta. Tambe na tur kontratista ku a duna un bon kontribushon riba e dia aki. Sin e ayudo grandi aki, e dia aki lo no tabata un éksito.
Curaçao Clean Up ta spera ku despues di djasabra último, nos lo sa pa sigui tene Kòrsou limpi. Un isla limpi ta na bienestar di nos salú i nos ekonomia. Kòrsou ta di nos tur i ta nos tur tin ku mantené limpi i sigui tene nos wowo habrí pa kada sushi ku nos mira rònt di nos. Ta huntu nos por logra esaki i sigui konsientisá otro pakiko nos mester biba riba un isla limpi.
Un be mas DANKI na UN I TUR a kontribuí pa Curacao Clean Up pa di 10 bia logra e meta pa un Kòrsou limpi.
