Cicely van der Dijs awe mainta a bai sinta su kastigu na SDKK !

WILLEMSTAD –  Cicely van der Dijs, awe mainta a mèldu na prisòn SDKK pa bai kumpli ku su kastigu di prisòn, relashoná ku e kaso Babel. Ora ku señora van der Dijs a yega SDKK i ku ela despedí di su sernan kerí, ela duna un komentario hopi kòrtiku pa prensa. Ela bisa ku e mester interumpí su bida pa sinta un kastigu miéntras ku banda di ta un mama, e ta un dunadó di trabou na 220 trahadó i ademas e ta un hende inosente.

Den kaso Babel, ku Gerrit Schotte, ku e tempu aya tabata su pareha, a akusá nan di aktonan ilegal. Pa loke ta konserní Cicely van der Dijs, ta akus’é di falsifikashon di dokumentonan i tambe ta akusá van der Dijs ku ela habri un kuenta, riba kua nan tabata risibí plaka di Corallo. Relashoná ku e akusashonnan aki, van der Dijs a haña un kastigu, ku ela apelá i despues a bai Hoge Raad. Pero Hoge Raad a kondená tur dos indikando ku tur kos ta keda meskos. Cicely a haña kastigu di 15 luna di prisòn, di kua 6 luna kondishonal. Entretantu Gerrit Schotte, a kumpli ku su kastigu di 3 aña di prisòn. Tin indikashon ku a eksonerá  Cicely algun tempu pa e por kuida su yunan, miéntras ku Gerrit tabata kumpli ku su kastigu.

Siman pasá djamars, señora van der Dijs a pidi durante Raadkamer, pa lag’e permanesé den libertat, pero Hof a bisa ku nò i ku e mester bai sera tòg i ku e mester reportá awe na prisòn na Koraal Specht. Esei ta loke ku Cicely van der Dijs a hasi tambe awe mainta.