Lokal
CIBC FirstCaribbean Walking Dinner 2022 a sa di konkistá e kaya kulinario di Penstraat debí na bon asistensha
Willemstad, – E gran kantidat di hende alegre ku a partisipá na e CIBC FirstCaribbean Walking Dinner 2022 a sa di hala atenshon di esnan ku tabata trafiká riba kaya dia di e evento, i tabata prueba sufisiente di e éksito ku e evento tabatin. Un biaha mas CIBC FirstCaribbean a generá un bon kantidat di entrada ku lo bai pa Prinses Wilhelmina Fonds.
CIBC FirstCaribbean Walking Dinner ta e aktividat prinsipal na Kòrsou den un seri di aktividat ku ta forma parti di e di 11 edishon di CIBC FirstCaribbean Walk for the Cure.
E kambio di lokalidat e aña aki ku restourantnan diferente for di e añanan anterior a hasi e evento di e aña aki, asta pa hendenan ku ya a partisipá den pasado, un anochi di deskubrimentu ku hopi sorpresa agradabel.
“Nos ta kontentu ku e partisipashon na nos CIBC FirstCaribbean’s Walk for the Cure Walking Dinner di e aña aki. Penstraat, nos bario bisiña a resultá di ta un esenario adekuá pa nos evento kulinario,” Timba Engelhardt, Country Head of CIBC FirstCaribbean pa Kòrsou a bisa.
El a gradisí e patrosinadó mayó NuCuraçao Windparken B.V. banda di Avila Beach Hotel, Blues Restaurant Curaçao, Fish & Joy Bistro, OBaAr Brazilian Lounge, Sal the Kitchen, Soi95, miembronan di staf di CIBC FirstCaribbean i tambe e partisipantenan.
“Nos ta spera di pronto entregá nos kontribushon na Prinses Wilhelmina Fonds manera ta nos tradishon,” el a añadí.
CIBC FirstCaribbean su Walk for the Cure ta selebrá su di 11 aniversario e aña aki i ta sigui sirbi e meta pa generá fondo pa kombatí kanser. E Walking Dinner a bira un evento úniko pa Kòrsou, debí na nos amor pa kuminda ku bon sabor ku ta disponibel aki riba nos isla. Esaki tabata e mihó forma pa tene un evento similar na esnan di añanan anterior, tumando na konsiderashon e senarionan di salú ku tabata na vigor durante di e último añanan, komo resultado di e pandemia di Covid-19, miéntras tòg partisipantenan por gosa di platonan sukulento prepará pa e mihó shèfnan.
Durante e último 10 añanan CIBC FirstCaribbean na Kòrsou a kontribuí riba un base kontinuo na Prinses Wilhelmina Fonds, komo muestra di apresio pa e trabou balioso ku nan ta hasi den e lucha kontra di kanser.