CGTC ta felisitá direktiva di ABVO pa e elekshon ku djabièrne siman pasá

WILLEMSTAD. CGTC ta deseá e direktiva entrante tur klase di éksito pa e temporada nobo ku nan ta bai drenta.

CGTC semper ta pará kla pa duna un man, pa apoyá i sostené tur su miembronan afiliá, i den e kaso akí ta konta pa ABVO tambe.
Sindikalismo tei, pa buska solushon kaminda tin diferensia di opinion i funshonamentu, i ta sòru semper pa e aspekto di liderazgo i madures prevalesé den tur desaroyo demokrátiko i organisativo.
CGTC ta spera ku e trabounan pa sali na bienestar di e klase trahadó i spesialmente e miembronan di tur organisashon, lo keda un punto di lansa fuerte.

Kaminda mester di sosten, nos ta kla pa yuda den esaki.
Miembronan di tur organisashon mester komprondé, ku e lucha no ta di un par di dirigente so, pero ku ta di tur miembro kontribuyente, p’asina konhuntamente mara kabes, buska e mihó alternativa- i solushonnan pa e kousa ku ta di nos tur.
CGTC ta finalisá bisando, ku tin basta trabou pa keda realisá durante e temporada difísil ku nos pais ta pasando aden, ta pesei sindikalismo i trahadónan no por pèrdè e konsentrashon for di bista, pero mester keda enfoká riba e solushonnan, pa yuda saka pais i miembresia dilanti, manera nos tur ta deseá.