Cedanne Rafaela, prospekto YDK di Red Sox: “Bo tin di kontrolá, loke bo por kontrolá”…

Cedanne Rafaela ta un dje prospektonan mas kayente di Boston Red Sox. Cedanne a firma pa un bónus simpel i bai Repúblika Dominikana.
E ta rekordá ku su Tata a puntr’é si e ta sigur, i el a bisa ku e ta kla pa bai p’é. Den e liga dominikano no a bai fásil na prinsipio, pero e pelotero YDK a keda konfia den su mes i traha duru tur dia. “Dia m’a haña oportunidat m’a probechá.
M’a sigui traha duru”, el a konta den entrevista ku Calili Ruiter ayera den Deporte Hoyer. Rafaela a move pa baseball profeshonal na Estádos Unídos, i keda traha fuerte. E ta bisa ku baseball unda ku bo hunga ta mental. Bo tin di keda focus den loke bo ta hasi, i kontrolá loke bo por kontrolá, e ta splika. Si bo traha e forma ei, kosnan tin di bai. Cedanne tambe ta pone Dios padilanti.

El a konta ku e manager di Red Sox ku ta Alex Cora a splik’é ku hungando infield i outfield lo yud’é sigur pa kumpli ku su soño. Rafaela a bisa ku e diferensia entre nos baseball i e baseball profeshonal ta hopi. “Ora bo firma pa hunga profeshonal bo tin di train i traha tur dia.

Na Kòrsou bo ta train 3 biaha pa siman.

Tin un diferensia grandi”, e ta splika. Bo tin di kustumbrá di train i traha tur dia.

El a konta Calili Ruiter ku el a kuminsá na e Organisashon Tra’i Seru serka “Coach Jòsy”, despues el a bai Montaña serka “Tante Diana” (Diana Daal), “Coach Pancho”, “Coach Bull” i “Coach Percey” tur a kontribuí den su desaroyo na Kòrsou komo mucha.
Cedanne a probechá dje paro debí na Covid, trahando duru. El a bira mas fuerte. El a konta di su agresividat koriendo base, pero un agresividat kontrolá. Naturalmente e ta sumamente kontentu di hunga den “Future Game” All Star. Cedanne lo sigui traha tur dia pa mantené nivel haltu tantu hungando den infield, komo outfield.
Sin duda un tremendo entrevista ku e prospekto Cedanne Rafaela a hiba ku Carl Ruiter den Deporte Hoyer.