CBV ta konsulta ku su miembronan personalmente

WILLEMSTAD – Trahadónan di CMC a reakshoná hopi positivo riba e enkuentro personal ku nan tabatin ku direktiva di CBV e siman aki. Despues ku a surgi un situashon ferfelu den e sindikato, ora ku dos miembro a akusa e direktiva di mal maneho finansiero. Segun e miembronan entre otro nan no ta risibi informashon tokante di biahe ku e presidente a hasi pa eksterior. Direktiva di CBV a rechasá e akusashon aki.
E presidente di CBV a splika ku tur miembro na tur momentu por risibi tur informashon ku nan ta desea tokante dje maneho di e sindikato. Un maneho transparente i partisipashon di tur miembro, ta un dje metanan di e direktiva di CBV ku algun luna pasá a sinta.
Durante un reunion di Konseho di Partido di CBV ku a tuma luga despues dje deklarashon di e dos miembronan na televishon, pa royeer e miembronan. NOBO a kompronde ku finalmente un dje miembronan mes a tuma su retiro for dje sindikato mientras ku a royeer e otro miembro.
E siman aki a tuma luga tambe un reunion di shopstewardnan di CBV, kaminda ku a duna e shopstewardnan tur informashon tokante dokumentonan finansiero. Annaliza Mathilda, presidente di CBV a bisa NOBO ku e shopstewardnan a keda satisfecho ku e informashon ku nan a risibi.

RONDA DI BISHITA
Direktiva di CBV ta haña importante pa tin bon komunikashon ku su miembronan. Ta pesei ela kuminsa un ronda di bishita na tur e instituto kaminda ku e tin miembro pa informa tokante e situashon ku a presenta den e sindikato.
E prome insituto tabata na CMC, kaminda ku e miembronan di direktiva a papia ku e miembronan ku nan a topa. E sindikato a risibi sosten serka praktikamente tur e trahadonan ku nan a papia kune. ‘’Nan a pidi nos pa no preokupa i pa kontinua ku e trabou’’. Asina Mathilda a bisa NOBO.Ot ro siman e bishita ta kontinua na Birgen di Rosario.
NOBO tin informashon ku mientrastantu SSK a reuni ku direktiva di CBV i tambe ku e eks miembronan di e sindikato riba e problema ku a surgi. A disidi ku un komishon lo atende ku e situashon.