CBCS ta refutá e akusashonnan grave i falsu di Nina Ansary

WILLEMSTAD/PHILIPSBURG – Centrale Bank van Curaçao en Sint Maarten (CBCS) a tuma nota di e kobertura duná den varios medio di komunikashon (NOBO nò a kubi e notisia ya kuno por a verifiká nan verasidat) di sierto ponensianan ku Nina Ansary a hasi i ta refutá esakinan kompletamente.
Ta remarkabel kon Nina Ansary ta rekurí na akusashon falsu i difamatorio kontra paisnan i organismonan di gobièrnu di Reino, i funshonario haltu ku ta enkargá ku e kaso di Ennia.
Meskos ku su tata, señora Nina Ansary ta presentá su mes komo un benefaktor di komunidat, siendo ku un korte independiente di Reino Hulandes a deklará tantu e komo su tata kulpabel di akto ilísito kontra Ennia i kontra Ennia su aseguradonan.
P’esei mes, Korte a kondená señora Nina Ansary tambe na paga mas di NAf. 945 mion na daño i perwisio. Na Estádos Unidos tambe korte independiente a dikta sentensia na fabor di Ennia ku tabata representá pa CBCS.
Su deklarashonnan relashoná ku benta di Banco di Caribe, ku antes tabata parti di Grupo Ennia, no ta kuadra ku realidat i ta difamatorio. E benta menshoná ta e resultado di un proseso profeshonal i diligente di parti di CBCS, asistí pa diferente organisashon eksperto i di renombre internashonal na Hulanda i Estádos Unídos.
Por último, ta bon pa menshoná ku no tin niun alto funshonario di CBCS ku ta bandoná su funshon próksimamente refiriendo indirektamente na José Jardim.
CBCS lo keda enfoká riba lo prinsipal—rekuperashon di e dañonan kousá pa miembronan di famia Ansary i otronan, na interes di Ennia su doñonan di pólisa.