Canada a sanshoná eks presidente Haitiano Michel Martelly akusá di ta finansiá gengnan kriminal

PORT AU PRINCE – Sebastien Carrière embahador di Canada ku ta stashoná na Haiti a deklará ayera den un rueda di prensa ku gobiernu di su pais a sanshoná eks presidente Haitiano Michel Martelly i dos eks promé ministernan Laurent Lamothe i Jean Henry Céant.
E motibu dikon segun Sebastien Carrière gobiernu di Canada a sanshoná e tres polítikonan aki ta debí ku nan ta finansiá gengnan kriminal na Haiti.
E sanshon a tuma luga despues di ku promé minister di Canada Justin Trudeau a denunsia e komportamentu di e polítikonan Haitiano ku ta benefisiá di e akshon di e gengnan ku ta kousando bastante problema na Haiti.
Sebastien Carrière a splika ku servisio di inteligensia di Canada i Merka tin datonan konkreto kaminda tin prueba ku Michel Martelly, Laurent Lamothe i Jean Henry Céant ta benefisiá direktamente na momentu ku e lidernan di e gengnan haña plaka reskate di kasonan di sekuestro.