Caminda pa recuperacion: 74.8% di Aruba ta vacuna

ORANJESTAD-Entre e centronan di vacunacion na tur districto principal habri casi tur dia y e cuater VacunaTHON cu a tuma lugar, por bisa cu mayoria di Aruba den tur demografico cu mag di tuma e vacuna contra Covid-19, ta completamente vacuna.

DVG ta reporta: 57% di e grupo di 12 pa 17 aña ta vacuna caba, mientras cu 74.1% di esnan entre 18 cu 59 aña a haya nan vacuna y 82.1% di esnan cu 60 aña of mas, ta proteha.

Nos “Hangua Nacional” ta mustra un 74,8% di vacunacion colectivo. Nos ta riba bon caminda pa Aruba su recuperacion.

Sinembargo e meta ta pa yega un porcentahe di por lo menos 85% di personanan completamente vacuna na Aruba. Actualmente e cantidad total di dosis duna na Aruba ta mas o menos 153 mil. Esey ta entre 70 pa 80 mil persona.

Ora nos ta compara e cifranan aki cu otro paisnan manera Kenya of Nigeria, cu ta 1.51% y 0.8% completamente vacuna respectivamente, por bisa cu nos ta bayendo basta bon.

Keto bay e pais Emiratonan Arabe Uni (UAE) t’esun cu mas persona vacuna den mundo (90%), aunke esaki ta conta solamente e total di vacuna duna den su totalidad. E pais cu mas persona vacuna COMPLETAMENTE den mundo actualmente ta Portugal, cu un porcentahe di 81.1% respectivamente y tras di dje ta sigui UAE, cu 78.5%.