Lokal
BULLENBAAI DEN FUNSHON ATROBE PA GENERÁ ENTRADA I EMPLEO
Willemstad- Miéntras Refineria di Kòrsou (RdK) ta traha duru pa konkluí negosashonnan i yega na un akuerdo di durashon largu ku Caribbean Petroleum Refinery (CPR), Curaçao Refinery Utilities (CRU), un kompania supsidario di RdK, a yega na un akuerdo ku CPR ku ta permití CPR almasená produkto na e terminal di Bullenbaal.
E akuerdo di almasenahe ta pará lòs for di e akuerdo di mas aña pa operashon di refineria i e terminal na Bullenbaai ku RdK i CPR ta negoshando aktualmente.
E akuerdo ta enserá ku lo por almasená te ku 7 mion barí di produkto na e terminal.
Danki na e akuerdo aki por spera, riba término kòrtiku, akividatnan relatá na karga i deskarga di barkunan di karga i tambe aktividatnan di trasbordo na Bullenbaai. Esaki sigur ta generá entrada pa CRU, mas oportunidat di empleo riba e terminal i adishonalmente mas oportunidat di negoshi pa Kompania di Tou Kòrsou (KTK). Mientrastantu, e negosashonnan ta kanando ku e meta firme pa yega na un ‘Heads of Agreement’ mas pronto ku ta posibel.