Briefing tékniko promé ku Parlamento sigi trata lei pa nivelá salarionan tòp

WILLEMSTAD – Parlamento ta keda pendiente di un briefing tékniko relashona ku e asina yama lei Landsverordering Optimalisering Overheidsgelieerden Entiteiten. Ayera komishon sentral di Parlamento a kuminsa prepara pa trata e lei.Despues a skòrs e reunion pasobra prome ku ta trata e Ordenansa, Parlamento ke e briefing tekniko.
Segun Parlamentario Amerigo Thode, promé ku e lei aki mester di e briefing aki. Pasobra gobièrnu ta presenta e lei aki, ku por kalifika komo un lei un tiki mankaron. Pero di parti di gobièrnu mes no ta tende nada enkuanto kon e lei ta hinká den otro. Pues segun Thode, mester sinta den Parlamento, ku ekspertonan di gobièrnu pa haña mihó informashon riba e lei aki.
Segun parlamentario Anamaria Pauletta (PAR), mester bai aworaki di akuerdo pa tin un lei na drechi. Skorsmentu dje reunion mester kontribui na yega na un lei na drechi. Esei por kompronde for dje deklarashon di Pauletta. Segun e parlamentario, no por ta asina ku ta keda manda lei pa Parlamento, i ta asumi ku parlamento mester stop, para òf atendé ku akuerdonan ku gobièrnu mester atende kune. ‘’Nos no por ta watch dog di gobièrnu’’. Nos mester ta responsabel pa nos trabou, pero gobièrnu tambe mester ta responsabel.
Partido KEM tambe a bai di akuerdo pa skòrs e reunion, manera ku parlamentario Thode a propone. Importante pa e lider di KEM, Low Martines, ta ki dia ta reanudá e reunion importante aki.
Pa parlamentario Osepa (PNP) no mester krea e imprenshon ku Parlamento no ke pasa e lei aki i hasi e kambionan tan pronto posibel. ‘Pa loke ta trata e rekorte di 12.5 porshento pa amptenarnan, no mester lubida ku e rekorte enkuestion ta ankrá den un lei. Mester tene kuenta ku ta e lei mester kambia i no kondishon di ningun otro hende’. Asina Osepa a bisa.
Na final di e deliberashon entre dje parlamentarionan, Komishon Sentral a disidi ku ta skors e reunion te un otro aviso.

RECHASO
Presidente di Parlamento durante dje reunion di Komishon Sentral riba e e Landsverordering Optimalisering Overheidsgelieerden Entiteiten, a rechasa e persepshon ku ta parlamento a tarda pa atende ku e lei.
Tin un persepshon ta biba ku parlamento tabatin e lei aki wanta durante dje ana aki anto awor ku minister a pidi un reunion urgente, nos a kore atende. Presidente di Staten a bisa ku e mester aklará ku dia 21 di juni 2021, a manda puntonan pa minister. Dia 9 di uni 2022, parlamento a haña e kontestanan aki.
Parlamento no por trata e leinan aki sin e kontestanan di minister. ‘Ta ora ku nos haña e kontestanan, nos por atende e lei aki. Pa e motibu ei, nos a yama e reunion awor, no pa motibu ku minister a pidi pa yama e urgente paso nos tabatin e wantá’’.