Boto patruyero di Wardakosta i avion Dash ta interseptá ‘go-fast’ riba laman

WILLEMSTAD, Wardakosta ayera mardugá a detektá un ‘go-fast’ sospechoso den besindario di Klein Kòrsou; e ‘go-fast’ aki tabata nabegá den direkshon Nort.
Mesora e Sentro di Reskate i Kordinashon di Wardakosta a dirigí un boto di patruya Metal Shark huntu ku e avion Dash na e lokalidat, pa interseptá e ‘go-fast’.
Na yegada di Wardakosta na e sitio e boto sospechosonan a purba di hui. E tripulashon di Metal Shark durante e persekushon a lòs tirunan di atvertensha pa purba di obligá e ‘go-fast’ pa stòp.
E tripulantenan di e ‘go-fast’ a ignorá e atvertensha aki i a hisa nan velosidat pa purba di skapa.
Tripulashon di e Metal Shark despues di esaki a dispará tirunan dirigí riba e motornan, ku a okashoná ku esakinan a paga i e ‘go-fast’ a para.
Despues di e intersepshon e ‘go-fast’ ku seis pasahero Venezolano a keda hibá na e pir di Wardakosta, i a listra e boto rigurosamente. Aki a haña un kantidat di bulto di droga i arma. E seis hòmbernan, e armanan i un kantidat grandi di droga a keda entregá na Kuerpo Polisial Kòrsou pa mas investigashon di e kaso aki.
E droganan entretantu a keda destruí.