Boneiru ta mas delantá ku Kòrsou……. Riba tereno pa introdusi energia limpi i ekonomiko

WILLEMSTAD. Energia limpi, duradero i pagabel te palabra magiko den sektor politiko na Ulanda i Boneiru, isla ku ke avansá ku pasonan gigantesko riba tereno di loke nan ta yama energia limpi i duradero.

Aña pasá un delegashon tekniko Ulandes a bin planta e simiya futuristiko na Kòrsou pero parse ku e mata a seka mientras ku aki na Kòrsou minister plenipotensiario Carlton Manuel a anunsia e siman aki na Ulanda ku e minister di energia duradero, Jetten, a kopia for di un rapòrt di TNO (e palasio di teknologia Ulandes) ku aki 10 aña Kòrsou lo por ta sentro di distribushon di energia duradero.
E nòmber magiko pe proyekto yama Living Lab i mester bira un instituto ku ta marka paso den Karibe riba tereno di energia duradero i mester ta un eksportador importante di energia renovabel den Karibe.
Foi dos aña pasá gobiernu (Rhuggenaath), Universidat di Kòrsou i un kantidat di empresa na Kòrsou lo a sera kabes pa kopera ku empresanan ulandes i kurasoleño.
Empresanan manera Havenbedrijf Rotterdam ku a yega di anunsia plannan industrial grandi pa nos haf pero no a materialisá. Damen ku na lugá di krese a krimp, i varios kompania industrial Ulandes ku nunka mas a tende di nan.
Na Kòrsou, Refineria di Kòrsou (RdK) ku ta den un fase di kaba sera of sigi na un tamaño limitá, Selikor i ABC Busbedrijf ku nan eksistensia ta kologa na un hilu tambe nan ta menshoná den e pool.
E uniko kompania sólido ku reportadamente ta den e pool ta Aqualectra ku ta echando pa’lante ku of sin Living Lab.

SALBABIDA
Pa Refineria di Kòrsou (RdK) TNO a traha un análisis di posibel rutanan di transishon i despues di tabata 100 aña di operashon tabata un fuente importante di entrada i pilar di ekonomia pa Korsou i mester krea aktividat i produkto rapidamente pa tapa e buraku ku nan a bai laga.
E kabuya ta, kua dje plannan aki ta realista i duradero i pa Kòrsou no keda horká ku proyekto aventurero ku ta kosta plaka i talbes aki 20 aña lo mira e resultado.
Un kos sí nos por garantisá: Boneiru a sufri hopi aña di sekura ekonomiko pero tin tur indikashon ku e mandatarionan i Boneiru ta tokando e boton magiko pa elevá nivel di bida nan pueblo.