Bolsonaro a asistí na e entiero di Reina Elisabeth II

BRAZILIA – Jair Bolsonaro presidente di Brazil a biaha for di djasabra último pa Londres pa asistí na e entiero di Reina Elisabeth II.
E lider di e partido ultraderechista brasileño su avion presidensial a lanta buelo na Recife despues ku ela kaba ku su kampaña na e lokalidat ku yama Garanhuns.
Por sierto mester bisa ku Jair Bolsonaro a nase na Recife i ku a haña un públiko bastante grandi ku a bini risibié na su kampaña polítiko.
Jair Bolsonaro a bisa ku ela haña invitashon di famia real Britániko komo presidente di Brazil na e entiero di Reina Elisabeth II.
Tin informashon ku Jair Bolsonaro su kasa primera dama Michelle de Paula Firmo Bolsonaro tambe a biaha kuné pa Londres djasabra.
For di Londres presidente Bolsonaro lo biaha pa New York pa partisipá djamars komo promé orador na e apertura di Asamblea General di Nashonnan Uni.
Mester bisa ku Jair Bolsonaro ta pensa ku elo por gana elekshon presidensial 2022 pero resultado di último enkuestanan ta mustra ku eks presidente Luiz Inacio Lula da Silva tin un bentaha amplio riba dje.