BOKA SAMÍ TA KLA PA SIMAN DI KULTURA

Willemstad – Djadumingu 26 di sèptèmber pa djadumingu 03 di oktober ta siman di kultura.
E tema e aña aki ta, “Bienestar den konteksto kultural”.
Lema ta, “Konop’é, hals’é i traspas’é”.
Bario di Boka Samí tambe ta selebrá Siman di Kultura i e punto prinsipal di e evenementunan ta rondo di e “Sede di Fundashon Piskado Nos Ta”.
Lo tin eksposishon di un famia piskadó di antes ku ta praktika sanashonnan manera, skibi Kolibri, haladó, Frumu i saka sla ku yerba. Tambe sr. Carly Boom ta presente pa elabora riba sanashon.
Dia 3 di oktober bo ta bai haña sr. Richenel Ansano ku tambe ta un sanadó.
Tin un buki di famia Zimmerman di mas ku 5000 nòmber i potrètnan bieu di Boka Samí. Tin materialnan pa konsientisá e pueblo di Kòrsou pa konserva nos rifnan.
Otro di e aktividatnan ku lo tin na Boka Samí ta kaminata, Aguafari, Aguajocking, Zumba, paseo den boto i kumida na diferente lugá.
For di djarason aki nos ta kuminsa ku un kaminata di anochi.
Tur kos ta kla pa un siman di kultura ku hopi konosementu i eksperensia uniko.
Pa mas informashon, Marlon Regales 5173294.