Bo ke sa kiko ta COHO? Amtenarnan na Den Haag ta bai goberná nos pais: Bon of Malu?

WILLEMSTAD. Kòrsou a drenta un fase kaminda politikonan ta ‘by-pass’ instansianan ofisial di gobiernu ulandes pa bai depositá nan petishon i reklamonan serka parlamentarionan ku por yama nan i pidi kuenta i rason di nan aktonan.
E táktika nobo aki a bai asina leu ku awor hasta direktor di hospital nobo a by-pass instansianan di nos pais pa bai lobby serka parlamentario pasobra e gerensia ta sinti ku nan ta sklama sin haña oidu serka nos ministernan.
Realidat di bida ta ku di un banda ministernan nobato ta eksigi pa SVB baha su gastunan ku 23 mion florin pero no a tene kuenta ku mayoria dje gastunan multimionario ku Covid ta kousando ta kome for di kaha di SVB.
E situashon ta tal, ku CMC tin un debe atrasá di 46 mion florin di hür i henter e struktura di hospital nobo ta un telearaña ku ora un laiko subi e tereno ei, ta manera riba un kampo di mina anti personal e ta kana.

FIANSA ULANDES
Den kualke minutas di reunionnan di parlamento di Kòrsou i di Ulanda, por lesa kuantu miyar di florin Ulanda a fiha Kòrsou kaba despues ku na 101010 nan a sana e debe di henter Antia.
Awe nos ta mas leu for di kas: Ulanda a fia Kòrsou sentenares di mion florin i a kambio ta pidi, nò: eksigi: pa nan dirigi e pais aki.
Esei ta lanta e interogante (no ‘interogatorio’ manera hopi lokutor lokal ta bisa) ku si esei ta Bon of Malu.
Primeramente Kòrsou mes a bai di akuerdo ku Ulanda den Lei di Konsenso ku ta serka Ulanda so nos pais por fia plaka kontra 0% interes of en todo kaso un interes masha abou.
Nada malu den esei. Pero a kambio di esei Ulanda por obligá nos pais (unilateralmente) huntu ku Aruba i Sint Maarten pa entregá gobernashon na amtenarnan ulandes.
Pa ser franko: si un empresario bai fia un miyar florin na un banko komersial, e banko tambe ta pone kondishon pa sigurá ku e empresario por paga e plaka bèk.
Kiere desir ku e strategia si no t’asina insólito,
E problema ta ku nos gobernantenan i parlamentarionan no ta lesa loke tin pará riba papel pero esei ta un enfermedat hereditario dje pueblo aki ku ta kuminsa for di ora nos ta bai skol.
Ta kua mucha ta lesa buki despues ku nan a kaba skol? Pió ainda: ta kua hende grandi ta lesa manual di un televishon moderno promé ku e hinka e stèker den stopkontakt?