Birgen di Rosario no tin derecho riba supsidio adishonal

…..Minister mester duna aklarashon mas detayá……

WILLEMSTAD. Apesar ku Minister Larmonie mes a komprometé pa duna mas supsidio ku loke ta duna aktualmente.
Minister mester aklará mas detayadamente e deskuento ku ela apiká riba supsidio regular.
Fundashon Birgen di Rosario, ku ta ofresé kuido médiko i aktividatnan na hende mayor di edat, a pidi Minister di Desaroyo Sosial, Labor i Bienestar (SOAW) un supsidio di un montante di NAf 9.862.700,- pa aña 2020.
E montante aki ta konsistí di un supsidio regular i un supsidio adishonal.
E petishon pa un supsidio adishonal ta basá riba un palabrashon entre e minister i e fundashon. E minister a rechasá e petishon pa un supsidio adishonal pa e fundashon. E minister a otorgá e supsidio regular, pero un montante mas abou ku loke e fundashon a pidi i ku semper bai a paga den pasado.
Den e prosedura aki e fundashon ta hasi un apelashon riba e prinsipio di konfiansa. Ta asina ku e minister a skibi un karta na e fundashon den kua e ta menshoná ku e tin derecho riba un supsidio adishonal pa aña 2020.
Korte ta evaluá e apelashon riba e prinsipio di konfiansa a base di algun paso. E prome paso ta e pregunta si tabata tin kuestion di un kompromiso di parti di e minister.
Den e kuadro ei ta relevante si e fundashon mester tabata konsiente ku e minister no tabata outorisá pa kompromete su mes.
A base di e lei ku ta regardá reglanan di kontabilidat ta e minister di Finansa mester a duna su opinion tokante di e kompromiso en kuestion i esei no a sosodé.
Kòrsou ta un komunidat chikitu.

Relashonnan personal ta hunga un ròl grandi i un rechaso eksplísito no ta ser duná fasilmente.
P’esei ta importante ku reglanan tokante outorisashon i tumamentu di desishonnan formal mester ser apliká estriktamente.
Den e konteksto aki, ta spera ku un persona konserní na Kòrsou konosé e reglanan legal òf ta hasi investigashon tokante esaki, sigur ora ta trata reglanan legal tokante eventual kompromisonan.
Di e fundashon no por spera e investigashon aki. E karta den kua e minister a komprometé su mes tin e siguiente frase: “ ku despues di konsiderashon interno nos a yega na e desishon pa tòg duna Fund. Birgen di Rosario un supsidio adishonal (…)”.
E fundashon por a asumí ku e minister a kordiná e promesa ku e minister di Finansa. Tòg e apelashon di e fundashon riba prinsipio di konfiansa no a logra e meta desea pa e fundashon.
E siguiente paso ta e pregunta si tin otro interesnan ku ta pisa mas ku e interes di e fundashon kaminda ekspektativanan hustu a ser duná.
Despues ku e minister a kompromete su mes ku e fundashon a sera akuerdonan ku Hulanda tokante sosten di likides.
Tambe e situashon finansiero di pais komo konsekuensia di e pandemia COVID a empeorá. Den e kaso aki e interes general pa trese i mantené òrdu di e finansas di gobièrnu ta pisa mas ku e interes di e fundashon.
Sí ta asina ku e minister mester bolbe konsidera e supsidio regular ku a pidí.
Ta parse ku e montante mas abou ku e minister a otorgá komo supsidio regular ta basá riba un deskuento di e tarifa pa kliente.
E minister mester duna un splikashon mas detayá dikon el a otorgá un supsidio regular mas abou di loke a ser pidí dor di e fundashon.