Bienestar Total i un peso salú pa tur: “Un bon nutrishon promé i durante embaraso ta esensial pa un yu salú!” Skibi pa Melly Bergland, Wellness Coach.

Den kuadro pa promoshon di Bienestar Total i un peso salú pa tur Melly Bergland, Wellness Coach ta trata e siman aki ku un bon nutrishon promé i durante embaraso ta esensial pa un yu salú.
Melly ta kontribuíendo engrande ku Papiamentu komo outor di bukinan di Transformashon, bukinan di Reseta, bukinan di Menú, buki di Detòks Wholístiko, bukinan di Renobashon Spiritual, bukinan di Biba Veggie Style i bukinan di Reseta Veggy Style, Buki di Reiki i varios manual di kurso pa desaroyo pèrsonal.
Tur e bukinan aki ta optenibel na Piramid Top Wellness Center.
Awendia mayoria hende ta plania pa haña yu.
Lo tin hende muhé tambe ku ke baha di peso promé ku nan haña un yu.
E estado di nutrishon di e muhé promé ku e sali na estado ta di sumo importansia, pa tantu e mama komo pa e yu ku ta bin na mundu. Si un muhé tin un estado di nutrishon malu dor di kustumbernan di komementu robes òf p.e. dor ku e la tene un dieta muchu estrikto, e chèns ta grandi ku e tin un skarsedat na un sierto kantidat di nutriente.
E yu ta haña su kuminda via di e mama.
Ora e mama no tin sufisiente reserva di sierto nutrientenan, e ora ei e no por duna e yu sufisiente tampoko.
Un estado di nutrishon malu di un muhé ta nifiká un komienso malu pa e yu. Si e kustumbernan di nutrishon ta bon promé ku embaraso, e yu tin un bon komienso.
E providensia di proteina mester ta bon; e desaroyo i e kresementu di e plasenta, e yu i e klirnan di e pechunan, ta eksigí proteina komo supstansia di konstrukshon.
Nos kuminda generalmente ta kubri sufisiente proteina pa e nesesidat aki.
Dor ku e eskeleto di e yu ta desaroyá, tin un nesesidat grandi pa Calcium.
Calcium ta ser warda den e tegidonan di e wesunan i pa e motibu ei e ta duna e wesunan fortalesa.
Dor di bebe un glas di lechi ku un tiki vèt por tapa e nesesidat di Calcium èkstra aki.
Dor di formashon di sanger di e yu i pa motibu ku e delaster lunanan e yu ta traha un reserva di heru, e providensia di heru di e muhé na estado mester ta bon.
E hende muhé mester sòru pa su kuminda ta riku na heru manera, karni, produktonan di grano volkoren, bonchi i berdura. Banda di esaki ta importante tambe pa e kuminda kontené un produkto ku ta riku na vitamina C.
Ora tin vitamina C den bisindario, heru ta ser tumá mihó den sanger.
Por hasi esaki dor di p.e. bebe un glas di djus di apelsina na yuna. Hopi sorto di berdura i tambe batata ta kontené vitamina C.
Ora ta kome kuminda kayente, e heru den e karni por ser tumá bon den sanger debí na presensia di vitamina C den e berdura i e batata.
Durante di e embaraso, e nesesidat di foliumzur i vitamina B 12 ta oumentá.
Ámbos vitamina ta hunga un ròl den kresementu di e tehido. Suplemento pa foliumzur ta rekomendabel for di mas òf ménos 4 siman promé ku embaraso tuma lugá, te 8 siman despues. Bo ta haña vitamina B 12 den karni, piská, webu, lechi i keshi.
Bo mester sòru pa e produktonan aki ta bon representá den bo menú diario. Un bon providensia di vitamina D ta nesesario pa Calcium ser tuma bon den sanger.
Vitamina D ta un vitamina ku ta disolvé den vèt i bo ta hañ’é den produktonan riku na vèt manera, manteka, margarina, halvarina.
Vitamina D ta ser forma den kueru bou di influensia di rayonan di solo.
Ku e kuminda normal, e nesesidat di oumento di vitamina D no ta ser duna.
Ta rekomendabel pa bebe un suplemento di esaki for di e di kuater luna di embaraso.
Enkonekshon ku e chèns pa preshon haltu di sanger òf retenementu di vògt durante di embaraso, ta mihó evitá hopi natrium den kuminda.
Bebementu hopi òf moderá di bibidanan ku ta kontené alkohòl, a demonstrá di ta sumamente desbentahoso pa kresementu i desaroyo di e yu. Si bo ta desea mas splikashon tokante e tópiko aki bo por pasa kumpra e Buki di Transformashon volúmen 23 titulá “Ora bo ta enamorá ku bo bida bo ta kontrolá bo kuminda!” skibi pa Melly Bergland òf sigui e kurso aki.
– Pa mas informashon di un menú balansá por buska un buki Menú di ougùstùs 2021 i su buki di Reseta.
Kursonan pendiente ta kurso ku MENU entre 25 i 31 ougùstùs mainta 8:00 òf atardi 6:00 ku durashon di kuater siman i kurso ANALISIS DI BO PERSONALIDAT djasabra 4 sèptèmber merdia 1:00 pa atardi 5:00, FAST WEIGHT LOSS PLAN djaluna 13 sèptèmber mainta 7:30 òf atardi 17:30 ku durashon di 5 dia, kurso BIBA VEGGIE STYLE djarason 21 sèptèmber mainta 11:00 òf anochi 7:00 ku durashon di ocho siman i kurso TRANSFORMASHON djamars 10 ougùstùs mainta 11:00 òf anochi 7:00 ku durashon di seis siman,. – Tuma kontakto ku Melly Bergland òf Piramid Top; Menegrandeweg 2 òf bèl 869-7733 òf 510-2770 òf app. 520-8544. Bo por email tambe na info@piramidtop.com. Bishitá i like nos Facebook page di Piramid Top Wellness. Kòrda ku “PREVENSHON T’E SOLUSHON”.