Barbie lo saka popchinan dediká na muhénan ku ta lucha kontra e pandemia di Covid

E fabrikante di artikulo di hunga Barbie a anunsia lansamentu di su popchinan nobo dediká na sientifikonan ku a yuda den e lucha kontra Covid-19. E idea a krese pa duna rekonosementu na e sintífiko Sarah Gilbert, kreado

di e bakuna Oxford/AstraZeneca, tambe na miles di hende muhe mas ku a lucha den e difísil trabou kontra e pandemia, asina Mattel a anunsia resientemente.

Den un prinsipio Gilbert, professor di bakunologia di e universidat di Oxford a haña e inisiativa poko straño, pero despues a bisa ku e ta spera ku esaki lo ta un inspirashon pa e próksimo generashon pa sigui traha riba e tereno di siensia i teknologia entre otro.
Ademas di Sarah Gilbert, e marka Barbie a presentá sinku modelo femenino mas ku mester sirbi komo inspirashon pa hóbennan.
E popchinan ta representá Amy O’Sullivan, enfermero di urgensia di e hospital Wycoff (Nueva York), Audrey Cruz, dokter na Las Vegas kende ta lucha kontra deskriminashon. Tambe Chika Stacy Oriuwa, dokter kanades; Jaqueline Goes de Jesús, sientifiko brasileño ku ta hasi investigashon biomédiko i Kirby White, dokter australiano ko-kreado di un bata moderno pa e personal ku ta traha den salubridat.