Banko Sentral ta atvertí…. Revitalisashon di ekonomia no ta garantia pa rekuperashon

WILLEMSTAD/PHILIPSBURG – Banko Sentral ayera a emiti un komunikado ku por ser interpretá komo un baño di awa friw riba e euforia ku a bin ta reina den prinsipalmente sektor di turismo despues di publikashon dje ultimo sifranan di turista ku a yega Kòrsou for di prinsipalmente Ulanda.
E periodo di franko miseria ku hopi sektor tantu ofisial komo privá a pasa aden i ainda ta pasando aden, no ta dunando muchu indikashon pa ‘kanta makamba’ sino mas bien nos ta bisti bosal na wowo (sic!!) pa no mira e avalancha di preis haltu ku ta na kaminda. Tin un realidat ku ultimo simannan más i más ta grawatá nos kurpa i esei a e problema di transporte di merkansia ku na Merka mes ta kousando hopi problema i oumento di preis. Ta premirando ku preisnan di produktonan basiko i nesesidat lo bai subi ku 40 den e proksimo seis lunanan si no logra resolvé e ‘tapón’ di barku merkantil ku ta tapando hafnan na kosta west di Merka.
Hopi hende, hendenan den gobiernu i hasta ‘captains of industry’ den sektor privá no ta mira e peliger aki pasobra nan interes pa skucha notisia no a yega mas leu ku tende un lokutor polisial grita ku nan ta ‘trapááá’ riba notisia.
Ounke ku e atvertensia ku Banko Sentral a emiti nan nos pareser ta poko i kualke medida di korekshon lo kousa dòbel doló, ta rekomendabel pa tuma nota di esaki.
Kombiná ku esaki nos ekonomia no ta krese.
Na Kòrsou, Produkto Interno Bruto real lo tin un oumento marginal di 0,1% na 2021 (ku ta ñaña), pero na 2022 esei lo aselerá te na 6,2% ku ta gigantesko!
E perspektivanan pa Sint Maarten ta mas positivo i ku tur nan problemanan di korupshon i mal gobernashon, nan ta bai laga Kòrsou atras ‘a leguas’.
Banko Sentral ta premirá (pronostiká) un subida di 3,4% di Produkto Interno Bruto real na 2021, siguí pa un oumento di 14,4% na 2022. Na tur dos pais, e rekuperashon ekonómiko ta impulsá prinsipalmente pa un oumento den aktividat turístiko.
‘No opstante, e revitalisashon ekonómiko akí no ta garantisá ku ekonomia lo sigui rekuperá na un manera sostenibel’, asina presidente di Centrale Bank van Curaçao en Sint Maarten (CBCS), Sr. Richard Doornbosch, a atvertí den Banko boletin regular.
‘Mirando ku e datonan di mas resien ta kuadra ku e proyekshonnan ku CBCS su perspektiva ekonómiko a hasi na yüli, no tin kambio den e kresementu proyektá’, Doornbosch a sigui splika.
‘En bista di e subida di preis internashonal di petroli i e problemanan di suministro na nivel mundial, ta proyektá un oumento fuerte di inflashon den 2021, te na 2,9% na Kòrsou i te na 2,0% na Sint Maarten.
Debí ku nos ta dependé asina tantu di importashon, e desaroyonan akí tin un efekto direkto riba nos preisnan lokal. Pa 2022, ta premirá ku e preshon inflashonario lo baha un poko’, el a sigui bisa.
Ademas di e perspektiva pa 2021 i 2022, e boletin ta ofresé un análisis di e desaroyonan ekonómiko den e promé kuartal di 2021.
E análisis ei ta revelá ku si bo kompará e promé kuartal di 2021 ku e promé kuartal di 2020 (ku a kuminsá ‘promé ku COVID’), por mira ku Produkto Interno Bruto real a sigui kremp rápidamente den henter e Union Monetario komo konsekuensia di e pandemia di COVID-19 i e medidanan ku a tuma pa kontené esaki.
Na Kòrsou, Produkto Interno Bruto real a kai ku 13,0%, mientras ku Sint Maarten a registrá un kaida di 22,1%.
E kontrakshon ekonó-miko fuerte ku tabatin na tur dos pais ta resultado di un bahada fuerte den demanda neto for di eksterior, kombiná ku ménos demanda doméstiko. Un análisis di kada sektor apart ta mustra ku balor agregá real a kontraé den mayoria di e sektornan di ekonomia di Kòrsou i di Sint Maarten, aunke prinsipalmente den sektor di restorant i hotèl, di komèrsio por mayor i detal, di transporte, almasenamentu i komunikashon, i di bien rais, hür i otro aktividatnan di negoshi.