Banko Sentral Komun di Kòrsou SXM ta full di akuerdo pa maksimalisá top salarionan

WILLEMSTAD – Awe mainta representantenan di Banko Sentral a duna un presentashon den Parlamento, relashoná ku preparashon dje lei pa maksimalisa salario di dirigentenan di NV-nan di gobièrnu.
A skòrs e reunion aki dia 5 di juli ultimo, despues ku a hasi pregunta den e uniko tanda , na invitadonan ku tabata presente den e reunion. Banko Sentral a duna su motivashon di posishon di Banko Sentral, relashona ku e lei di maksimalisashon di salario.
Julian Lopez Ramirez, presidente den funshon di Hunta di Komisario di Banko Sentral tabata kompañá pa dos otro miembro di Banko Sentral: Leila Matroos-Lasten, ku ta miembro di Raad van Bestuur i Miroslava Wederfoort , miembro di Hunta di Komisario di Banko Sentral.
Banko Sentral, pa medio di Lopez Ramirez, a duna su punto di bista riba stipulashon di norma pa salarionan; Posishon speshal di Banko Sentral enkuanto e prosedura i independensia komo banko sentral; remarkenan general riba stipulashon di norma i determinashon di banko sentral riba struktura salarial nobo.
Komo prome punto Lopez Ramirez a menshona ku Banko Sentral di Kòrsou i Sint Maarten, ta kompletamente na fabor pa norma e salarionan den sektor semi publiko. Segun Banko Sentral pa esaki tin dos motibu prinsipal:
Pa perkura ku no tin situashonnan inaseptabel i kompletamente for di tur norma di país. Na e otro banda ora ku tin un norma, esei generalmente tambe ta perkura pa limita e diferensia entre e entradanan mas abou i esnan mas altu.
E posishon speshal di Banko Sentral, ta basa riba dos punto.
Na prome luga, ta e prosedura partikular ku mester enkamina pa yega na e struktura salarial di tantu e hunta di direktiva di Banko Sentral, e komisarionan i tambe e personal dje Banko. Mas aleu Lopez Ramirez a menshona ku e ta regla spesifikamente pasobra Banko Sentral no ta di Kòrsou so. E ta un banko konhuntu, di dos pais outonomo den Reino, di Kòrsou i Sint Maarten.
Enkuanto Banko Sentral komo banko dje dos paísnan outonomo, stipulashonnan di e norma, banda di e medidanan korespondiente i mantenshon di reglanan disiplinario di corporate gouvernance, e ta un tema ku ta kai bou dje statuto bankario.
Segun e prosedura partikular pa prosedura bankario a base di deliberashon entre paísnan, Kòrsou i Sint Maarten, mester yega na un areglo huntu , ku despues mester haña un validez legal uniforme den tur dos país.
Esaki ta un dje puntonan, ku na e momentu aki, Banko Sentral ta premirá un problema relativamente komplika, mirando ku e norma ku Sint Maarten ta aplika, ta kompletamente diferente for di esun ku ta den e proposishon di lei di Kòrsou.
Esun di Sint Maarten no a yega parlamento ainda, pero no ta verwagt ku e lo ta similar na e montante ku ta den e lei di Kòrsou.