Banko Sentral di Rusia lo no prohibí depósito i sirkulashon di dóler i euro

MOSKU – Elvira Nabiullina presidente di Banko Sentral di Rusia a deklará ayera ku nan no tin ningun intenshon pa prohibí sirkulashon di dòler i euro.
Esaki ta nifiká ku invershonistanan por sigi depositá nan monedanan ekstranhero inkluyendo dòler i euro normal den bankonan na Rusia.
Elvira Nabiullina a splika ku gobiernu di Rusia a kuminsá eksigí nan klientenan pa paga gas i produktonan petrolero na Rubles.
Den e kaso aki segun Elvira Nabiullina sistema finansiero di Banko Sentral di Rusia ta ópera diferente ya ku mester di otro tipo di divisa pa fortalesé ekonomia di pais.
Rusia ta e pais mas kastigá pa sanshonnan imponé pa Merka i Union Europeo ku ta rechasá e operashon militar kontra Ukrania.
Pa prome biaha sanshonnan imponé pa Merka, Canada, Inglatera i Oustralia ta inkluí deskonekshon parsial di Rusia di e sistema SWIFT.
Esaki ta pone ku Banko Sentral di Rusia no por yega nan reservanan internashonal ku por kondusí na un kolapso finansiero na kualkier momentu.
Ta pesei ta manda un mensahe na invershonistanan ekstranhero pa no pèrdè konfiansa den sistema finansiero na Rusia.