Banko mester paga interes akumulá riba kuenta di spar di hende ku a muri

WILLEMSTAD. Pa regla un banko no ta kalkulá interes riba un kuenta di spar di un difuntu pero korte a haña ku e kondishon ei ta inaseptabel segun normanan di hustisia.

Loke a sigi a kontinuashon ta un kaso ku hende ku pasa den un situashon similar awor tin kaminda di buska nan derechi legal kontra di un preis masha rasonabel.
No masha aña pasá algun siudadano a lanta Stichting Consumenten Belangen Curaçao pa buska derechi di loke ta toka e ku su rumannan legalmente.
Den e kaso aki yunan dje difuntu a kontrata presidente di e fundashon SCBC pa na nomber di e yu muhé i su dos rumannan eksigi pa banko paga e interes ku a akumula riba e kuenta di spar for di dia ku nan mama a fayesé na aña 2018 i e yunan a keda komo uniko heredero.
Pero e kuenta no a kaba aki pasobra dia e tata a fayesé, banko a hasi mesun kos: nan no a pasa e interes riba e otro kuenta dje yunan.
E tata a fayesé su siguiente aña i riba dje tambe interes a keda konta riba e buki di spar ku nan mayornan tabatin na PSB ku e suma di NAf 43.033 riba dje ku e yu muhé a pidi PSB pa pasa riba un kuenta na otro banko.
Nan a pidi e banko pa pasa e interes ku a akumulá despues di morto di nan tata tambe pero e banko no a hasi kaso.
Wes a sensurá e banko su argumentonan pasobra e ruman muhé a demostrá ku dokumento legal ku e ta hibando e kas pa nan tur ruman.
E yu muhé a reklamá pa banko pag’é interes riba e suma prinsipal for di dia ku e tata a muri te riba e banko a pasa e interes riba otro kuenta di banko. I esei ‘op de cent af’ a sali NAf 2.459,02
Ainda PSB no a entregá i nan abogado a argumentá ku derechi riba interes ta kaduká dia e portador di kuenta muri pasobra asina ta pará den e kondishonnan regular dje banko.
PSB a fiha posishon riba e regla aki ku den kaso di fayesimento di portador dje kuenta, ta paga e interes na e herederonan.