Banco di Caribe ta atvertí tur kliente

Willemstad: Resientemente, un mensage di ‘SMS’ a sirkulá via telefòn pa indiká na e kliente di Banco di Caribe ku su kuenta di Visa a keda limitá debí na transakshonnan sospechoso.
Pa medio di e ‘SMS’ aki ta pidi kliente di Banco di Caribe pa reaktivá su kuenta dor di klek riba un lenk pa duna informashon di su tarheta di krédito.
Porfabor sea konsiente ku Banco di Caribe lo no manda mensage di teksto ni e-mail na niun kliente pa reaktivá nan kuenta di Visa Card.
Tin diferente método ku personanan ku malintenshon ta usa pa por aksesá bo informashon personal òf di bo kuenta bankario.
Via di e-mail, mensage tekstual òf WhatsApp nan ta pidibo pa konfirmá/verifiká entre otro bo number di telefon, esun di bo tarheta òf kuenta bankario. Tambe nan por pidibo pa verifiká bo number di PIN.

Na momento ku risibí e tipo di mensagenan aki, Banco di Caribe ta pidi su klientenan pa no duna niun informashon i tambe pa no primi riba e ‘link’ ku ta bini den tipo di mensagenan aki.
Porfabor tuma kontakto ku nos Departamento di Servisio na Kliente mesora pa raportá esaki.
E number di telefon ku por yama nos ariba ta 432 3200.