Lokal
Banco di Caribe ku sosten spesial na Betèsda
WILLEMSTAD: Resientemente Banco di Caribe a hasi un bishita na e fasilidat pa adultonan mayor, Betèsda.
E kas di kuido den transkurso di añanan a konosé hopi kambio. Manera tur hende sa, Betèsda a tene su kolekta na luna di mart último, sinembargo Banco di Caribe ke enkurashá tur esnan ku no a logra kontribuí den luna di kolekta pa hasi esaki via di un transferensia bankario na kualke momento durante aña.
Banco di Caribe ta tuma su responsabilidat komo siudadano empresarial mashá na serio. No tur ora ta pa hasi donashon, sino tambe pa pone lus riba tópikonan importante i na su turno inspirá komunidat pa demostrá empatia pa esnan vulnerabel, manera nos grandinan.
Den e kaso di Betèsda, ta pa yuda konsientisá komunidat riba e nesesidat ku e kas di kuido tin pa un kushina i un ‘overdekte’ nobo. Pa hasi esaki, Banco di Caribe a produsí un video pa Betèsda ku lo por mira próksimamente na televishon i riba retnan sosial di manera ku por inspirá komunidat pa hasi un aporte, meskos ku Banco di Caribe.
Ku enfermeronan, paramédikonan i guiadónan di aktividat kapasitá i dediká, Betèsda ta enfoká na alsa kalidat di bida di su habitantenan. Bida ta sigui den Betèsda tambe! Sinembargo, awor mas ku nunka Betèsda mester di bo aporte. E kushina di Betèsda, un espasio kaminda ya pa 33 aña, diariamente e trahadónan ta ehersé nan trabou ku amor i dedikashon ta rekerí remodelashon, pa por sigui funshoná di forma optimal. Aparte di e kushina, e espasio ku ta destiná pa e habitantenan move, rekreá i sosialisá tambe mester di remodelashon. Lamentablemente awor aki e abitantenan no por rekreá, debí na e rayonan fuerte di solo i tambe áwaseru.
Ta p’esei mester krea un espasio kubrí. Esaki lo garantisá mas seguridat, aktividat sosial i posibilidat pa e habitantenan mobilisá.
Aportá kaminda bo ta!
Banco di Caribe ta enkurashá komunidat pa marka e diferensia. Por hasi un transferensia pa Betèsda ku un donashon chikitu òf grandi na number di kuenta 15285001 di Banco di Caribe.
