Ayera tardi: Kandela na Brickell City Centre na Miami

MIAMI – Ayera alrededor di 2:45 pm sentral di polis a risibí un yamada ku tabatin huma ta sali for di Brickell City Centre ku ta keda na un lugánan mas eksklusivo na Miami.
Mesora sentral di polis a notifiká sentral di bomberonan i ambulans pa manda brantspùit pa atendé ku e situashon.
Na yegada di vários brantspùit na e luhoso hotel aki na Brickell City Centre a bin logra evakuá primeramente tur hende i trata na paga e kandela.
Komo ku e edifisio di Brickell City Centre tabata bon ekipá ku sistema di paga kandela huntu ku tremendo trabou di bomberonan a bin kontrolá e situashon.

Pa suerte ningun hende a resultá herida i ku despues di algun ora empleadonan di Brickell City Centre a kuminsá ku limpiesa di e kompleho.
Tin informashon ku un kortosirkuito por a kousa ku e kandela a kuminsá na un di restorantnan di luho di East Hotel ku tin den e edifisio di Brickell City Centre.