Ayera nochi na Iglesia di Buena Vista: Pichingolo a gradisí pa 40 titulo di kampeon.. I salú di tur miembro…

Pichingolo Nissan/Kia Motors manera ya a bira un tradishon tur aña ta pidi un Santu Sakrifisio di Misa na Iglesia di Buena Vista pa gradisí Señor pa e temporada ku ta tras di lomba.

E aña aki no tabata eksepshon, ounke ku e misa di e aña aki tabatin un toke spesial ya ku Pichingolo a Sali kampeon di Kòrsou pa di 40 biaha den nan historial di 49 aña di eksistensia.

Ta e organisashon a pidi un kontribushon pa e dak di Sentro Hubenil Don Bosco.
Sr. Cecil Garcia, presidente di Pichingolo a hiba palabra promé ku e Santu Sakrifisio di Misa a start.

E la splika ku no ta dje fásil ei ta bira kampeon manera hende lo kere, i hasta e la bisa ku e éksitonan di Pichingolo ta parse muchu bon pa ta bèrdat.

“No ta fásil pa kada aña di nobo motivá i keda gana, pero di un òf otro manera Pichingolo ta logrando esei”, e máksimo dirigente a splika.

Na final dje Santu Sakrifisio di misa Sra. Silvia Wilson-Clarke ku ta e promé kapitan di Pichingolo i un dje fundadonan a splika kon e tim a lanta, i e animo ku nan tabatin antes. “Nos kier a train tur dia mes”, e la deklará. E la rekordá ku den e bario di Buena Vista mes nan no por a haña dirigente, paso e hendenan di Buena Vista sa bisa ku nada di Buena Vista no ta dura. Sinembargo ku yegada di Taffy de Jongh, Chapè Bernardus i Cecil Garcia tur kos a kambia i Pichingolo a kue un otro rumbo. Despues di tabata pèrdè tur wega sin eksepshon i tabata laga nan ku awa na wowo e tim a kuminsá train mas serio i gana títulonan un tras di otro.

Tambe tabata presente ayera na misa Sra. Bernadita Geerman, ku a para komo manager di e tim ku edat di 15 aña ya ku niun dirigente no a presentá pa dirigí e tim.

Bernadita huntu ku Silvia ta e dos fundadonan dje organisashon asina eksitoso.

Tambe tabata presente Sra. “Yeya” Keep ku tabata manera un Mama pa e muchanan ku a kuminsá ku Pichingolo 49 aña pasá. Vários dirigente di ántes tabata presente tambe manera: Regnault Bloem i Herbert Bulo. Richard, “Chati” Constancia tambe a honra Pichingolo ku su presensia.

I no a bin man bashí, pero a hasi un donashon di su parti pa yuda rekonstruí e dak di Sentro Hubenil Don Bosco. Sr. Herbert Lispier a animá e misa ku su músika.

Despues di e misa a bai un ratu na tereno di Pichingolo kaminda a sinta un ratu na e kantina i freska e garganta.