‘’Awor ora bo studia bo ta bira persona non-grata !’’

Jamil Lasten: No ta bèrdat ku direktornan ta sinbèrguensa i ladron..

WILLEMSTAD – Te ku awe a krea un persepshon ku ta biba eifo i ku a presenta na Hulanda, ku no ta kuadra ku realidat, relashoná ku altura dje salario di direktornan di N.v. nan di gobièrnu. Enbes ku e persepshon aki a boltu, por ripara ku e ta birando pio. Jamil Lasten, direktor di Curiol a bisa awe mainta den parlamento: ‘’E persepshon ku ta biba tur kaminda, ta ku ta gastamentu di plaka tin den e N.v. nan di gobièrnu. Ku e direktornan ta gana bòshi di plaka, nan ta un sèt di sinberguensa i ladron’’. Segun Jamil Lasten, ultimamente ta hasta pone gruponan kontra di otro i bisa ku ta pasobra e direktornan ta stroba, un kantidat di hende no por haña alivio.
E persepshon robes aki ta e base di e lei di maksimisashon, segun Lasten, ta pesei e direktornan a bai duna Parlamento e presentashon awe. ‘’Nos tei awe ku un sentimentu miksto ku di un banda ta hopi ferfelu ku a yega asina leu, ku mester diskuti un tema manera esaki.
Pero di e otro un banda nos ta hopi orguyoso ku nos sistema ta funshoná’’. E direktor di N.v. nan ta agradesido ku Parlamento a Brinda nan e oportunida aki pa duna informashon riba e topiko.
Nan a traha un positon paper ku nan a manda pa minister i parlamento. Nan a prepara un presentashon basá riba e position paper ku ela traha.
Den su presentashon, Jamil Lasten a trese su propio historia dilanti, kon komo un mucha di famia humilde a studia i traha duru pa hasi su karera. Lasten ta menshoná ku mester konekta su historia ku e realidat aktual ku nos ta bibando awendia. Kaminda un grupo a krea un persepshon robes di un persona of di un grupo di persona.
Jamil Lasten i su otro koleganan profeshonal ta eksperensia tur dia ku ta saka mentira , bisa ku e ta gana 80 mil florin pa luna, lastre tur manera . ‘’Mi salario i mi sa ku e ta konta pa mayoria dje direktornan di N.v. di gobièrnu, kende ta bati i zundra nan, ta kumpli ku e asina yamá ‘’ Jardim-norm’’, di e eks kabinete Rhuggenaath,. A pasa e norma aki na 2016, pero nunka no a publiké.
E loke ku ta pasando aki ta muchu mas leu ku un simpel maksimalisashon di salario. E ta algu ku parlamento mester tene kuenta kune, tambe pa e hopi profeshonalnan ku ta studia hopi aña i traha duru pa yega kaminda ku nan.
E profeshonalnan ta di akuerdo pa introdusí un lei di maksimalisashon di salario, pero e mester tuma luga na un manera transparente i hustu. Manera a hinka e lei den otro aworaki, e no ta hustu, Jamil Lasten a bisa. E ta un lei diskriminatorio i ta laga sierto gruponan afo i banda di esei e no ta basá riba un kalkulashon korekto.