Awor numa notisia a yega Ulanda ku Brasil a entregá Robertico (41)

WILLEMSTAD. E siman aki medionan ulandes ku ta sigi paso di kriminalnan Kurasoleño a raporta Brasil a ekstradita Robertico “Tico” I., (41) kende nan ta sospecha di a tira hende mata dia 11 di yuli i 2015 na Den Haag.
Di akuerdo ku Ministerio Publiko, polis a persigi pista dje pistolero i a lokalis’é na Brasil for di unda nan a traslad’é pa Ulanda djaweps ultimo.
Polis a akusá Robertico di a tira mata Jursley Cijntje di 31 aña di edat i kende tabata miembro di e notorio gèng lokal No Limit Soldiers (NLS).
E asesinato ku Tico a kometé a tuma luga dia 11 di yuli 2015 kaminda ela tira dos hende dilanti un café den Herenstraat.
Nan a transporta e dos viktimanan ku ambulans pa hospital kaminda Jursley Cijntje a muri un ora despues pero e otro a sobrebibi ounke gravemente heridá. Polis ulandes a poné riba list di fugitivo di lei i tabatin un rekompensa di 15.000 Euro riba su kabes.
Outoridatnan a buska tantu na Ulanda komo Colombia of Republika Dominikana te ku nan a haña un pista i a arest’é na Brasil.
Den su apartamento nan a haña 83.000 di xtc i e mester a sinta un kastigu di pa trafiko di droga na Brasil.
E aña’ki Ulanda a pidi su ekstradishon i dia 5 di mei a presente dilanti wes-komisario pa prolonga su detenshon.