Awe ta dia Internashonal di Donante di Sanger… Banko di Sanger Kòrsou ta ehèmpel pa paisnan den Regio

WILLEMSTAD (D) – Nos Banko di Sanger tin un funshon di ehèmpel pa paisnan den Regio. Esaki sigur ta algu ku Kòrsou por ta hopi orguyoso di dje. Awe ta dia Internashonal di Donante di Sanger i den kombersashon ku Dokter Ashley Duits di Banko di Sanger, a bisa NOBO ku apesar dje pandemia di Covid-19, Kòrsou su Banko di Sanger su programa di Donante di Sanger a keda funshoná bon.’’Ora ku nos a premirá ku e pandemia ta bai surgi, nos a adaptá modelo a base di diferente programa’’.

Duits: “Banko di Sanger di Kòrsou ta bayendo hopi bon. Nos a adapta nos programa i por a keda mantene bon komunikashon ku nos donantenan’’. Esaki a pone segun splikashon di Duits, ku hasta den lock-down donantenan por a sigi akudi na Banko di Sanger. Esaki a pone ku Banko di Sanger por a sigi duna servisio na e hospitalnan.

EHEMPEL

Banko di Sanger di Korsou, pa motibu di su bon funshonamentu ta fungi komo ehempel pa paisnan den Regio, Ashley Duits a menshona.Na varios  pais, pandemia di Covid a pone hopi preshon riba e Banko di Sanger. Den kuadro di su rol di ehempel, Korsou lo duna un presentashon otro siman na Guyana, kon ela logra mantene su Banko bon operashonal den tempu di Pandemia. For di paisnan den Regio, Banko di Sanger Korsou ta haña hopi pregunta, kòn Kòrsou a realisa su programa di Donante di Sanger asina efektivo, no opstante e situashon di Pandemia di Covid-19.

‘’Duna sanger ta un akto di solaridat. Forma parti dje akshon is kapa bida’. Esei ta e slogan di e Organisashon Mundial di Salu, (WHO) pa awe, dia internashonal di Dunado di Sanger.  Segun Dokter Duits tur e donantenan di sanger na Korsou tambe, ta kontribui na solaridat. Banko di Sanger por konta ku nan.

Pa loke ta trata futuro, dokter Duits a bisa NOBO ku Banko di Sanger lo sigi traha pa haña donantenan nobo. E programa di outomatisashon tambe ta loke ku Banko di Sanger lo dedika atenshon na dje, dokter Ashley Duits ta bisa.