Awe nos ta kuminsá e Triduo Sagrado

Awe nos ta kuminsá e Triduo Sagrado. Ku selebrashon di Santu Sakrifisio di Misa “den Sena di Señor”, nos ta drenta definitivamente den kurason di Pasku. Yen di fervor i amor di Dios nos ta realisá e mesun gestonan di nos Dibino Maestro, Hesus, i nos ta skucha e mes palabra ku El a bisa.

Nos mester drenta den gloria di Señor Hesukristu pa medio di su Santa Krus.

Stima otro! Durante e Último Sena, Hesus ta laba pia di su Apòstelnan i E ta bisa nan ku forsa di su mes amor: “Stima otro! Manera Ami a stima boso, asina boso tambe mester stima otro. Si boso stima otro, tur hende lo sa ku boso ta mi disípulonan“. Esakinan ta su palabranan! Esaki ta su boluntat!. Esaki ta Hesus su aspirashon mas profundo! Amor ku ta bira mizerikòrdia, sirbishi, solidaridat. Union, tambe, pasobra, tur reino partí no por keda eksistí,  e lo ta destruí. Si bo lo keda uní, mundu lo kere ku Tata a manda Mi.

Boso tur kome! Boso tur bebe! Esaki ta e señal di e Aliansa nobo i eterno di Dios Tata ku humanidat: e Pan konsagrá i partí, e Biña konsagrá i bebí. Nan ta e seyo di fieldat di Dios i di su amor infinito pa hende. Asina tantu Dios ta stima nos, ku El a manda su Yu pa niun yu keda pèrdí. Esnan ku ta kome di e mesun Pan i ta bebe di e mesun Kális, ta forma un kurpa so, esun di Kristu Hesus.

Hasi esaki pa keda kòrda riba Mi. Pa nos por kòrda e Aliansa akí te na final di e siglonan, Hesus ta konsagrá su Apòstelnan pa kumpli ku e enkargo akí, ku e Ministerio aki. Hesus ta konsagrá nan i ta duna na un òrdu: “Kada be ku boso kome for di e Pan akí i bebe for di e Kális akí, hasié pa boso kòrda riba Mi i boso ta proklamá mi morto, te ora Mi bolbe bini“.

For di e anochi santu ei, Iglesia ta selebrá e bankete di su presensia, bankete di amor, di fe, di komunion, di solidaridat. I pueblo kristian mester kumpli ku e kompromiso di ta loke nos ta selebrá: mesa di fraternidat, signo di komunion i amor, pan di solidaridat ku tur esnan ku tin nesesidat.

Rumannan, ban selebrá Sena di Señor!