Atenshon internashonal pa Arkeologia di Kòrsou

WILLEMSTAD – Fundashon Nashonal Maneho di Memoria Arkeológiko i Antropológiko (NAAM) a sera un akuerdo di kolaborashon pa investigashon pa e proyekto internashonal ‘Curaçao Cultural Landscape Project’, den kua Kòrsou i su herensia kultural históriko ta para sentral. Despues di prepará kuater aña e proyekto a kuminsá.
Durante e próksimo luna studiantenan di arkeologia lo hasi investigashon práktiko bou di guia di arkeólogonan i ekspertonan lokal i internashonal ku konhuntamente lo analisá loke enkontrá.
‘Curaçao Cultural Landscape Project’
Kòrsou lo fungi komo modelo pa preguntanan sientífiko relevante awendia pa region di Karibe en konekshon ku kambionan den eco-sistema, biodiversidat, pero tambe kambionan di klima (climate change). E proyekto Curaçao Cultural Landscape lo konsentrá riba e pregunta kon habitantenan di Kòrsou, den pasado, a influensiá nan ambiente natural i biodiversidat, pero tambe si nan a pensa posibel solushon pa retonan di e klima, bou di kua sekura, tsunami’s, inundashon, etc. E resultadonan lo kontribuí na solushonnan pa konsekuensianan di awendia. E kuestionnan nan akí no ta regardá solamente e habitante di awor, manera ta pensá, pero a kuminsá ku e habitantenan di ántes (alrededor di 3400 promé ku Kristu) i te ainda tin efekto.

Organisashonnan ku ta kolaborá huntu
E kolaborashon entre partnernan ekivalente, Fundashon NAAM i Simon Fraser University na Canada, un universidat públiko ku ta enfoká riba hasi investigashon, University of Queensland na Brisbane, Oustralia, Departamento Paleoecologie di Max Planck Institute, un instituto renombrá paden i pafó di Alemania, i QLC inc. / InTerris Registries, un kompania merikano spesialisá den prosesá informashon pa proyektonan arkeológiko, ta subsidiá pa National Geographic Society, Social Science and Humanties Research Council na Canada i Simon Fraser University.
Programa pa públiko
Pa krea konsientisashon i partisipashon lokal a inkorporá partisipashon di públiko. Voluntarionan lo por yuda ekskavá i kolektá hayasgo i alabes será konosí ku e arkeólogonan i nan spesialidatnan. Personanan interesá por yuda riba djadumingu 10, 17, i 24 di yüli entre 8’or pa 11’or di mainta. Tambe por registrá komo boluntario pa yuda prosesá hayasgo (laba, surti, paketá).
Djasabra 30 di yüli lo tin un Dia Habrí pa esnan interesá den e resultadonan. E arkeólogonan lo desplegá e hayasgonan i lo splika tokante e investigashon práktiko i ki informashon nobo e investigashon a deskubrí. Bishitante nan lo tin espasio pa hasi pregunta.
Profesor Christina Giovas lo duna un tayer di Archeozoölogie den luna di ougùstùs. E tayer di tres dia akí lo tuma lugá na Fundashon NAAM, dia 6, 13, i 20 di ougùstùs di 9’or pa 3’or di mèrdia. Idioma di instrukshon lo ta Ingles, pero lo tin asistensia na Papiamentu i Hulandes.
Lo finalisá e promé parti di e proyekto ku un simposio digital na Novèmber, den kua lo kompartí resultadonan riba plataforma internashonal.