Atake na dos skol na Brazil a laga un saldo di tres morto i 11 herido

SAO PAOLO – Kapitan Mauricio Alexandre hefe di kuerpo polisial na e region di Espíritu Santo a konfirmá ku ayera den oranan di trèmerdia tres persona a fayesé i 11 a resultá herida den un atake arma na dos skol.
Lokual ku tin na informashon ta ku un adolesente bisti na paña di kamuflahe alrededor di 12:30 di ayera mèrdia nèt na momentu ku bèl a bati i ku e alumnonan mester a kambia di klas a baha for di un vehíkulo kore bai den skol i kuminsá tira ku un arma di kandela.
Despues di a kometé e barbaridat aki ela bai na otro skol ku ta keda apénas 100 meter di distansia i hasi meskos.
Tur e dos skolnan ku e adolesente aki a drenta sin pèrmit ta keda hopi serka di otro na e region di Espíritu Santo.
Kapitán Mauricio Alexandre a splika ku despues ku e adolesente a kaba di kometé e krímen horibel aki ela kore sali drenta den un vehíkulo i bandoná e sitio di krímen. Entre esnan ku a pèrdè nan bida tabatin dos profesor i un alumno i pa lokual ta esnan ku a risibí herida di bala tur tabata alumnonan di un skol priva.
Kapitán Mauricio Alexandre a splika ku bon trabou di polis na Espíritu Santo a pone ku a logra detené e adolesente algun ora despues ku a basha bala na e dos skolnan.