Atake di grupo islamita na un hotel na Somalia a laga un saldo di 21 morto

MOGADISHU – Den fin di siman ku a kaba di pasa vários hòmber fuertemente arma di e grupo radikal Islamita Al Shabab a ataka e Hotel Hayat di Mogadishu.
Segun fuentenan polisial di Mogadishu un terorista a kana drenta den e hotel i aktivá un bòm fura na su kurpa.
Konsekuensia di e atake di e grupo islamita Al Shabab di Somalia ta ku un total di 21 persona a keda asesiná.
E teroristanan a tene vários sivil sekuestrá durante mas ku 8 ora na e Hotel Hayat di Mogadishu.
Tin informashon ku tin un total di 177 sivil ku a keda hospitalisá debí na lokual a pasa na e hotel Hayat di Mogadishu.
E teroristanan di Islamita Al Shabab a logra hui pero entre nan tambe tin vários ku a resultá herida durante konfrontashon ku outoridatnan.