Ata faktornan ku a afektá pèrdida di Banko Sentral riba 2021

WILLEMSTAD. E bahada den resultado finansiero di CBCS na 2021 a ser parsialmente kompensá pa:
§ un oumento di aproksimadamente NAf 2,6 mion di interes riba invershon lokal, debí na e bononan ku a kumpra bèk di Sint Maarten Harbour Finance (SMHF) despues ku CBCS a kanselá e plan pa por rebendé e bononan aki dia 24 di febrüari 2021. E plan akí tabata ofresé e titularnan di bono nan en kuestion e posibilidat di bende nan bononan ku CBCS na tur momento pa balor nominal (100%);
§ un bahada di aproksimadamente NAf 0,8 mion den gastu di interes di sertifikado di depósito, komo resultado di un bahada den e tasa di interes ku ta ser paga pa e depósitonan aki (konforme e tasanan di interes abou riba merkado internashonal);
§ un oumento di mas ku NAf 0,8 mion den ‘otro entrada’ debí na un oumento den e gastunan di supervishon ku CBCS a kobra e institutonan finansiero bou di su supervishon, i eliminashon di algun kuenta den e ‘estado di bienes i debe’ di kual e término di 5 aña a ser surpasá, lokual a nifiká un entrada adishonal di mas ku NAf 3,0 mion; i
§ un bahada di mas ku NAf 7,9 mion den e gastunan, debí na un bahada den gastunan di reorganisashon inkluí den gastunan di Personal. Ademas, na 2021, CBCS a efektuá un transakshon di oro ku a enserá benta i kompra inmediato di un parti limitá di e reserva di oro. E transakshon akí no tabatin niun efekto riba e reserva total di oro, pero sí el a kondusí na realisashon di e subida di e balor di e oro ku a ser bendí (i kumprá bek) a konsekuensia di balorashon di oro na e preis di merkado, kual subida a resultá den un ganashi di mas ku NAf 8,5 mion.
E total di e estado di bienes i debe di CBCS di 31 di desèmber 2021 ta mustra un subida di mas ku NAf 254 mion kompará ku 31 di desèmber di e aña 2020. E subida akí ta entre otro resultado di e fondonan risibí di Hulanda den kuadro di (1) e sosten di likides suministrá na e paisnan Kòrsou i Sint Maarten pa por apsorbé e konsekuensianan negativo di e pandemia di COVID-19 i (2) solushon di e problemátika di Girobank.
Lo sigui traha riba rekuperashon Na 2022 i e añanan nos dilanti, CBCS lo sigui traha riba su rekuperashon finansiero. Pa logra esaki, CBCS lo traha riba mehorashon di su resultado finansiero. Lo traha riba mas oumento di entrada i, na mes momento, implementá mas medida pa kontené su gastunan.
Segun pronóstiko, tasa di interes internashonal lo kuminsá subi atrobe den e añanan benidero i, riba término mediano i largu, esei lo tin un influensia positivo riba CBCS su entrada di interes. CBCS a analisá su reservanan di divisa i a yega na un kalkulashon mas óptimo di e reservanan ku por ser invertí.
Ademas, a adaptá e maneho di reserva pa krea mas fleksibilidat den e opshonnan di invershon. Entretantu, un proposishon di kambio di e Statüt di Banko ku lo mester habri kaminda pa efektuá e fleksibilisashon akí a keda presentá na e Ministernan di Finansa di e dos Paisnan. CBCS ta premirá ku invirtiendo su reservanan na un manera mas rendabel, su entrada di interes lo sigui oumentá. Pa loke ta supervishon, e meta ta pa ku tempu esaki mes generá sufisiente entrada pa kubri e kostonan konserní.
Pa por logra esei, CBCS mester por kobra e institutonan finansiero ku ta bou di su supervishon pa tur su gastunan hasí den kuadro di supervishon.
Esaki ta algu importante, ya ku e lo yuda CBCS sigui garantisá e kalidat di supervishon i salvaguardá e konfiansa den sektor finansiero na e paisnan Kòrsou i Sint Maarten.