Asesinato na vèlt di SDK ta afektá deporte: Rèfrinan ta sapatiá kontra medidanan di seguridat di FFK

WILLEMSTAD – Despues ku komunidat a shòk pa motibu dje asesinato di un futbolista ku a tuma luga siman pasá pafo na vèlt di FFK na SDK, e kaso lamentable aki ta afektá deporte tambe. Direktiva di Federashon Futbol Kòrsou, FFK, despues dje asesinato a reuni ku kuerpo polisial i minister di husitisa. E desishon a kai ku ta tuma medidanan nobo di seguridat.
Entre e medidanan ta figura listramentu di e rèfrinan na vèlt.
E medida aki no a kai den bon serka tur rèfri.
Entretatantu hasta mester a kanselá algun partido. Den un partisipashon ayera nochi riba Facebook, direktiva di FFK ta menshoná ku a kanselá tur e partidonan di Liga MCB ku mester a tuma lugá ayera. ‘’Esaki pa motibu ku e rèfrinan no ta di akuerdo ku e reglanan nobo di seguridat ku FFK a implementá’’.
Ramiro Griffith, presidente di FFK a bisa awe mainta na Radio MAS ku no mester generalisá pasobra ta trata di algun arbritro ku a indika ku nan ta ninga pa listra nan.
Segun Griffith ayera nochi e huntu ku mas miembro di direktiva la papia kasi 1 ora ku e rèfrinan.
A base di e kombersashon ei a yega na e palabrashon ku awe nochi tin un kombersashon pa atende e situashon.
FFK, mester komunika i duna splikashon tokante dje asuntu aki, pasobra no ta sín mas FFK ta tuma e medidanan, Griffith ta bisa. Ta un palabrashon ku a hasi ku minister di hustisia i polis. Griffith ta konvensi ku e partidonan involví lo yega na un solushon.

TIN MAS KOS
Ramiro Griffith no ta kere ku e aktitut dje arbitronan ta basá solamente riba e akontesimentunan di e siman aki pero ku lo tin hopi mas kos ta hunga un ròl. Griffith no ke saka konklushon ainda pero ke warda e reunion di awe nochi tuma luga.
Awe nochi e rèfrinan lo haña oportunidat pa ekspresa nan preokupashon i diskutié ku direktiva di FFK, pasobra mester yega na un entendimentu ku otro.
Esaki ta nesesario pasobra a palabrá ku e arbritornan ku ta formalisá tur kos i FFK ta tene su mes na e palabrashonnan. ‘Mester realisa ku tur dos banda tin derechi, pero tin
debernanan tambe ku mester kumpli kune’. Griffith a añadí ku futbòl ta konsisti di un totalidat di rèferi, hungadó i di un direktiva.
Esei ta nifika ku ta konhuntamente mester yega na un palabrason.
E por tuma tempu, pero segun kosnan ta bai e partidonan lo siña konosé otro pasobra su meta ta pa drecha futbol di Korsou, e presidente di FFK a remarká.
KONFIANSA
E insidente ku a tuma luga siman pasá no tin di nada di haber ku futbòl.
E por a tuma luga tur kaminda, Griffith ta bisa.
E medidanan ku a tuma ta pa proteha tur hende.
FFK tin sigur ku segun tempu pasa, públiko ta rekobrá e konfiansa i asisti na enkuentronan di futbòl.