Arte pa CliniClowns, E Arte di Sonrisa!

WILLEMSTAD – Pa promé biá den historia, CliniClowns Kòrsou ta eksponé tur e obranan di arte ku vario artista a krea espesialmente pa e fundashon aki den e 10 añanan ku a pasa.
A usa e obranan aki riba e konosí i famoso tasnan di kompra di CliniClowns, ku kua e fundashon tabata e promé e tempu ayá. Na kuminsamentu di e aña aki a presentá ya e di 7 edishon di e ‘fundraising artbag’ aki, ku un ilustrashon di Sander van Beusekom. Produkshon di tasnan ta posibel danki na e sostén di varios patrosinadó, pa motibu di kua tur e ingresonan ta benefisiá e bon trabou di CliniClowns Kòrsou.
Entre otro pa motibu di e pandemia, e fundashon a buska otro manera i momentu pa ta visibel. Kaminda anteriormente tabata duna informashon i buska spònser na diferente lugá na Kòrsou, awóraki ya pa basta tempu esei no ta posibel. Por mira e obranan di arte original i e tasnan ku e imahennan ariba durante henter luna di sèptèmber den e kafeteria di Van Den Tweel na Zeelandia. Riba 25 di sèptèmber di 9or di mainta pa 1or di mèrdia, respresentantenan di e fundashon lo ta presente tambe pa kontestá tur bo preguntanan i pa inskribí donatùr nobo.
Fundashon CliniClowns Kòrsou ta trese distraishon i goso pa mucha ku malesa i mucha ku un limitashon físiko òf mental, i pa hende grandi ku demensia.
Pa medio di improvisashon, wega i muzik, e payasonan ta duna atenshon na e personanan tras di e malesa òf limitashon i asina ta krea momentunan chikitu di alegria i felisidat, ku kua un hende por sinti su mes emoshonalmente mas fuerte atrobe, ounke ta pa un ratu so.
E payasonan ta profeshonalnan entrená i tur bishita na e diferente institushonnan i kasnan ta kompletamente grátis. Esaki ta posibel solamente ku donashon for di komunidat.
Por sostené CliniClowns por ehèmpel dor di kumpra un tas, òf dor di bira donatùr.