Art for the Roses mas lat e aña aki

WILLEMSTAD – Despues di un silensio relativamente largu, loke ta debí na e pandemia di Covid-19, fundashon Ride for the Roses (Curaçao) ta laga tende di dje atrobe. Anke a programá e siguiente aktividatnan di Walk, Ride & Swim for the Roses te na yanüari 2023, durante e aña aki tòg direktiva ke hasi algu tambe pa rekoudá fondo. Pronto RFTR ta spera di por presentá e plannan pa sobrá di aña. Den esei ta inkluí en todo kaso pa mas den fin di aña pa organisá un “Art for the Roses” den koperashon estrecho ku Landhuis Bloemhof.
Ride for the Roses (RFTR) tin solamente un meta: rekoudá mas tantu fondo posibel pa yuda den e lucha kontra kanser. Ke men, e fondonan ta bai direktamente pa pashèntnan di kanser atraves di instansianan ku tin komo tarea pa kuida pashènt di kanser i/òf ta hasi investigashon riba tereno di kanser. Fondo Prinsesa Wilhelmina (PWF), ku pa añanan kaba ta tuma riba dje na diferente manera pa akohé i guia pashènt lokal di kanser i nan famia, ta un di e partnernan mas importante di fundashon Ride for the Roses. Direktiva di RFTR sa ku e por konta ku sosten di Orco Bank komo patrosinador prinsipal.
Riba un promé karta ku Landhuis Bloemhof a manda pa fula tera ken ke partisipá un grupo inisial di artista a reakshoná ku entusiasmo pa laga sa ku nan ke partisipá. Esei no tin nodi wanta otronan, ku no a haña un karta asina pero ku tambe ta interesá pa entregá un obra di nan pa e meta aki, pa mèldu esei na Landhuis Bloemhof van Santa Rosaweg. P’esei ta bai un yamada na tur artista di Kòrsou ku ke kontribuí na e bon kousa aki pa registrá na Landhuis Bloemhof via expo@ bloemhof.cw pa partisipá.

Rosa inkluí
E enkargo na partisipantenan ta ku nan ta entregá un obra di arte kaminda di un manera òf otro a inkluí un rosa. Pa nan trabou e artistatan ku partisipá ta haña un kompensashon i un persentahe di e suma pa kua nan obra ta kambia di doño. Nos no por lubidá ku nan tambe a sufri hopi a konsekuensia di e restrikshonnan pa Covid. Nan obra lo haña amplio publisidat. No únikamente online i riba website, pero Bloemhof lo eksponé e obranan tres siman largu na òktober i novèmber durante un eksposishon di e grupo. Na final di esei maestronan ku ekspertisio lo perkurá pa nan bende pa bon plaka na e findishi. Finalmente e obra ta bai pa e doño ku a ofresé mas tantu plaka p’e, miéntras ku asina na mes momento ta hasi un kontribushon valioso na e bon kousa.

Den e periodo antisipando e eksposishon i e findishi Landhuis Bloemhof lo organisá diferente aktividat ku tambe lo ta den kuadro di Art for the Roses. Na su debido tempu lo informá mas detayá di nan.